БИШКЕК, 20-авг. — Sputnik. 2016-жылдын 1-январынан тарта мугалимдердин категориясы кайтарып бериле турганын билим берүү жана илим министри Элвира Сариева жыл сайын өтүүчү шаар мугалимдеринин методикалык конференциясында билдирди.
Мугалимдерди аттестациядан өткөрүп, ыйгарылган категориясына жараша кошумча акча төлөө 2009-жылы алып салынган. Быйыл мугалимдин кесиптик деӊгээлин аныктоо максатында Билим берүү жана илим министрлиги тарабынан мектеп мугалимдери менен жети дубандын методикалык борборлорунун өкүлдөрүнүн катышуусу менен Бишкек жана Ош шаарларында фокус-топторду өткөргөн. Анда бир топ талкуудан кийин алып салынган мугалимди аттестациялоо системасынын киргизүү сунушталган. Мугалим аттестациядан өткөндөн кийин, ага ылайык категория берилчү.
Министр өз сөзүндө билим берүү жаатындагы негизги маселелерге токтолуп, мекеме мугалимдерди колдоо үчүн бардык аракеттерди көрүп жатканын билдирди.
"Мугалимдердин категориясын кайтаруу маселеси көптөн бери көтөрүлүп келет. 2016-жылдын 1-январынан тартып мугалимдер категориясы кайтарылып, окутуучулар аттестациядан өтө баштайт. Мындан тышкары, практиканттарга устаттык кылган тажрыйбалуу мугалимдерге өзүнчө категория каралат. Бул кесипкөй мугалимдердин өсүп чыгышына шарт түзөт", — деди Сариева.
Жыл сайын августтун экинчи жарымында өтүүчү мугалимдердин жыйыны быйыл 17-19-август күндөрү аймактарда өтүп, Бишкек шаарында билим берүү кызматкерлеринин съезди менен жыйынтыкталат.
