БИШКЕК, 24-июль — Sputnik. Кыргызстанда буудай аянты азайып, анын ордуна тоют багытындагы арпа, жүгөрү айдалып жатканын айыл чарба жана мелиорация министри Таалайбек Айдаралиев мекеменин коллегия жыйынында билдирди.
Анын айтымында, быйыл дан дан өсүмдүктөрүнүн жалпы айдоо аянты республика боюнча 643,2 миң гектарды түзгөн, бул өткөн жылга салыштырмалуу 13,5 миң гектарга аз.
Айдаралиев Кыргызстандын ЕАЭБге кошулуусунан улам эт жана сүт азыктарына болгон суроо-талап өсүп жатканын белгилейт. Мындан улам малдын башы көбөйүп, жем-чөп өсүмдүктөрүн айдоо аянттары кеңейүүдө.
"Мамлекеттин биримдик курамына кириши менен Кыргызстанда өндүрүлгөн картошка, жемиш жана бакча өсүмдүктөрүнө россиялыктар менен казактардын суроо-талабы жогорулап жатат. Мындан улам аларды айдоо аянттары кескин жогорулады", — деп билдирди министр.
Статистикалык комитеттин маалыматында, республика боюнча айдоо аянты 2014-жылга салыштырмалуу 4,8 миң гектарга кеңейип, жалпы жонунан 1185,9 миң гектарды түздү.
