БИШКЕК, 13-июль — Sputnik. Жогорку Кеңештин төрагасы Асылбек Жээнбеков Индиянын премьер-министри Нарендра Моди менен жолугушуу учурунда кыргыз тараптын Индия парламенти менен тыгыз кызматташуу ниети бар экенин билдирди. Бул туурасында парламенттин маалымат кызматы билдирди.
"Кыргызстанда парламенттик демократияны өнүктүрүүнүн эл аралык тажрыйбасы дыкат иликтенип жатат. Бул өңүттөн алганда Индия 1949-жылдан тарта парламенттик демократияны куруп, ийгиликтүү өнүктүрүп келе жатат. Бизде бул жол 2010-жылы башталды. Эксперттердин пикиринде, биз тандалып алынган жолдо ишенимдүү бара жатабыз. Кыргыз тараптын Индия парламенти менен тыгыз кызматташуу ниети бар ", — деди төрага Жээнбнеков.
Тараптар күз айларында Жогорку Кеңештин депутаттарын шайлоону уюштуруу жана өткөрүү, ошондой эле парламенттик демократияны бекемдөө, мамлекеттик маселелерди чечүүдө саясый париялардын жоопкерчилиги менен натыйжалуулугун жогорулатуу маселелери боюнча пикир алышты.
Жээнбеков Индия премьер-министри Модинин эки тараптуу мамилелерди бекемдөө үчүн Индияга иш сапары менен келип кетүү боюнча расмий чакыруусун кабыл алды.
Индиянын премьер-министри Нарендра Модинин Кыргызстанда иш-сапары учурунда президент Алмазбек Атамбаев, өкмөт башчы Темир Сариев менен жолугуп, кызматташуу боюнча ири төрт документке кол коюлду.
