БИШКЕК, 13-июль — Sputnik. Президент Атамбаев менен Индиянын премьер-министри Нарендра Моди сүйлөшүүлөрдүн жыйынтыгы менен басма сөз кызматкерлери үчүн билдирүү жасашты.
Мамлекет башчысы бүгүн кабыл алынган Кыргызстан менен Индиянын ортосунда биргелешкен Билдирүү эки өлкөнүн ортосундагы достук мамилелерди жана өз ара пайдалуу кызматташууну мындан ары тереңдетүү жана чыңдоо боюнча тараптардын ниетин жана көз караштарын чагылдырган негизги документ болуп калууга тийиш экендигин баса белгиледи.
Сапардын алкагында Индия менен Кыргызстандын госпиталдарынын ортосунда байланышты ишке ашыруу пландаштырылууда.
"Эки өлкөнүн дарыгерлери онлайн режиминде консультацияларды жүргүзүп, дарылоону ишке ашырат. Андан тышкары, индиялык тарап КР Коргоо министрлигине БУУнун тынчтыкты сактоо күчтөрүнүн аскердик-талаа госпиталын камсыз кылуу үчүн медициналык жабдуу өткөрүп берет", — деди президент.
Индиянын премьер-министри өз билдирүүсүндө эки мамлекет тең бирдей демократиялык баалуулуктарды кадырлагандыгы Кыргызстан менен Индияны бириктирээрин, регионалдык коопсуздукка, терроризмге жана экстремизмге каршы күрөшүүгө багытталган жалпы кызыкчылыктар эки өлкөнү баш коштуруп тургандыгын белгиледи.
Моди айыл чарбасында, билим берүүдө жана техникалык кызматташуу тармагында эки тараптуу мамилелерди активдештирүү зарылчылыгын белгиледи.
"Кыргызстандын ЕАЭБге кошулушу соода тармагындагы эки тараптуу мамилелерди жаңы деңгээлге алып чыгууга жакшы мүмкүнчүлүк болуп саналат", — деди Индия өкмөт башчысы.
Моди сөзүнүн соңунда Индиянын БУУнун Коопсуздук кеңешинин туруктуу мүчөсү жана ШКУнун толук укуктуу мүчөсү катары талапкерлигин колдоо көрсөткөндөгү үчүн Кыргызстанга ыраазычылык билдирди.
