БИШКЕК, 12-июль — Sputnik. Индиянын Премьер-министри Нарендра Моди менен жолуккан президент Алмазбек Атамбаев, кыргыз-индиялык кызматташуунун соода-экономикалык жана маданий-гуманитардык тармактардагы маселелерди талкуулады.
Президент Алмазбек Атамбаев Индиянын премьеринин сапары эки тааптуу кызматташууга түрткү берээрине ишенээрин билдирди.
"Сиз менен жолугуп, Кыргызстан жана Индиянын ортосунда достук мамилелерди өнүктүрүүнүн актуалдуу маселелери боюнча пикир алмашуу мүмкүнчүлүгүнө кубанычтамын. Кыргызстан Сиздин өлкө менен эки тараптуу кызматташууну кеңейтүүгө кызыктар. Сиздин бул сапарыңыз мамилелерибизди мындан ары активдештирүүгө түрткү берет деп ишенем", — деди Атамбаев.
Премьер-министр Нарендра Моди жылуу кабыл алгандыгы үчүн мамлекет башчысына ыраазычылык айтып, кыргыз-индиялык мамилелердин ырааттуу өнүгүп жаткандыгын канааттануу менен билдирди.
"Кыргызстанга бул менин биринчи сапарым. Мен Кыргызстанга региондогу демократияны өнүктүрүп жаткан өлкө катары келдим", — деди Нарендра Моди.
Түштөн кийин индия премьери Нарендра Моди Кыргызстандын өкмөтүнүн башчысы Темир Сариев жана Жогорку Кеңештин спикери Асылбек Жээнбеков менен жолугат.
