БИШКЕК, 3-июль — Sputnik. Биометрикалык маалыматтар мыйзамсыз деп табыла турган болсо, өкмөттүн башка планы бар экенин премьер-министр Темир Сариев РИА Новости маалымат агенттигине берген маегинде белгиледи.
Анын айтымында, мыйзам боюнча бюллетенди колго алардын алдында идентификациялоодон өтүү керек.
"Калк, саясий партиялар ушундай эреже киргизилгенине макул болушту. Биометрикалык маалыматтарды чогултуу кишилердин укугун бузбайт, бул болгону индентификациялоо гана. Эгер биометрикалык маалымат мыйзамсыз деп тааныла турган болсо, албетте, биздин башка пландарыбыз бар. Бул кадимки тизме болот. Ошентсе да, шайлоодо электрондук урналар коюлат", — деди премьер.
Биометрикалык маалыматтарды чогултуу 2014-жылдын август айында башталган. 16 жаштан жогорку бардык жарандар бармак издерин, сүрөтүн жана электрондук колун тапшырышы керек. Маалыматты чогултуу 2015-жылдын 1-августунда аяктайт. Жалпысынын республика боюнча 3 миллион 641 миң кишинин биометрикалык маалыматын алуу пландалып жатат.
