БИШКЕК, 3-июль — Sputnik. Оштогу өтүп жаткан урбан-форумга шаар бийлиги, шаардык кеңештин депутаттары, дипмиссиялардын, жаштардын, жарандык уюмдардын өкүлдөрү жана Москва, Нью-Йорк, Бишкек шаарларынан келген коноктор катышып жатат.
Мэр Айтмамат Кадырбаев бул форум шаар көйгөйлөрүн биргеликте талкуулап, өз ара пикир алышууга жакшы аянтча болуп жатканын айтты.
"Ош шаарында жарым миллиондон ашуун адам жашайт. Учурда шаардыктардын турмуш деңгээлин ар тараптан көтөрүү милдети турат. Бул иш-чара башка калаалардын жакшы тажрыйбаларын угуп, транспорт тыгындарына байланышкан жана башка социалдык түйүндүү маселелерди чечүүгө, инфраструктураны жакшыртууну үйрөнүүгө жакшы жардамчы болот деген ниеттемин", — деди Кадырбаев.
Форумдун алкагында коомдук транспорт, аймакты өнүктүрүү, жерди пайдалануу, шаар жашоосун эске алган курулуш, калаанын башкы планы талкууланмакчы.
