Чуулгандуу видеодогу инспекторлорду Турганбаев кызматтан албай турган болду

БИШКЕК, 2-июль — Sputnik. Пара талап кылды деп шектелген Жол кайгуул кызматынын (ЖКК) инспекторлорунун иши боюнча кызматтык териштирүүнүн натыйжасында аларга дисциплинардык чара көрүү чечими кабыл алынды.

Шейшемби күнү социалдык тармактарда ЖКК инспекторлорунун үч жүргүнчүсү бар унааны токтоткону тартылган видео жайгаштырылган. Машинада отургандар 28-июндан 29-июнга караган түндө болгон бул окуяны видеого тартып алышкан. Инспектордун пара талап кылып жаткан жерин тартып алгандан кийин сыртка чыгып кызматкерлердин документтерин сурашкан. Инспекторлордун жанында турган жарандар кийлигишип, араздашып кетишкен. Андан соң видеого ээ болуу үчүн инспекторлор машинанын артынан кууп жөнөшкөнүн жүргүнчүлөрдүн бири Болот Ибрагимов маалымдайт.

Шаршембиде Ички иштер министри Мелис Турганбаев ИИМ, ЖКК, Өздүк коопсуздук башкармалыгы, Бишкек жана Чүй ШИИБ жетекчилери менен ыкчам жыйын өткөрдү.

"Интернетте жарыяланган видеоматериалдын негизинде милициянын прапорщиги Жеңиш Чокморовго кызматына жарым-жартылай төп келбей турганы, ал эми старшина Урмат Белековго катуу сөгүш жарыяланды. Эки кызматкердин түздөт түз жетекчилерине сөгүш берилди", — деп айтылат билдирүүдө.

Буга чейин териштирүү учуруна аталган кызматкерлер иштен четтетилгенин маалымдалган.

ШИИБнын маалымат кызматы бейшемби күнү эртең менен милициянын штаттан тышкаркы кызматкери деп айтылып жаткан видеодогу негизги каарман табыла электигин билдирди. Аны издөө иш-аракеттери менен Октябрь РИИБ алектенүүдө. Маалымат катчы Олжобай Казабаевдин билдиришинче, анын аракеттери бейбаштык, коркутуу жана талап-тоноочулук катары аныкталган. Каарман үч жылдан беш жылга чейин эркинен ажыратылышы мүмкүн.