БИШКЕК, 19-июнь — Sputnik. Талас облусундагы Жер-Үй кенин иштетүү боюнча сынактын жеңүүчүсү деп табылган "Востокгеолдобыча" ААК тийиштүү сумманын калган бөлүгүн төлөгөнүн Геология жана минералдык ресурстар боюнча мамлекеттик агенттиги билдирет.
Сынактын негизинде Жер-Үй кенин иштетүү укугуна "Востокгеолдобыча" ААКсы ээ болгон. Мыйзам талабына ылайык, ишкана төлөнө турган 100 миллион доллардын 10 миллионун кепилдик катары мамлекетке которгон.
Буга чейин агенттик жалпы суммадан калган 90 миллион долларды төлөө мөөнөтү 2015-жылдын 22-июнунда аяктай турганын эскерткен.
Маалыматка ылайык, "Востокгеолдобыча" ААКсы 19-июнь күнү калган сумманы төлөдү. Каражат Геология жана минералдык ресурстар боюнча мамлекеттик агенттиктин эсебине которулган.
Талапка ылайык, каражат толугу менен которулгандан кийин беш жумушчу күндүн ичинде компания тийиштүү лицензияга ээ болот.
