БИШКЕК, 4-май — Sputnik. Конкурстун жыйынтыгы менен Жерүй алтын кенин иштетүү укугу "Восток-геолдобыча" ААКына профилдик комиссия чечими менен берилди.
"Восток-геолдобыча" ААКы, "Алданзолото ГРК" жана "Кыргызалтын" ААКы аталган кенди ишитетүү укугун алуу үчүн арыз беришкен. Конкурстук комиссиянын чечими менен үч компания тең конкурстун экинчи туруна өткөн. Кийин "Алданзолото ГРК" компаниясы конкурска катышуудан баш тартып, арызын чакыртып алган.
Аталган алтын кенин иштетүү укугун алуу лицензиясы үчүн баштапкы бааны 100 миллион доллар деп бекиткен. "Кыргызалтын" ААКы лицензия үчүн 111 миллион доллар сунуштаган. "Восток-геолдобыча" ААКы 11 миллион аз сунуштаган. Жобого ылайык, жогоруда сунушталган сумманын ар бир 10 миллионуна бирден упай берилген.
Конкурстун жыйынтыгына канааттанбаган "Кыргызалтын" Геология минералдык ресурстар боюнча мамлекеттик агенттикти сотко бере турганын билдирди.
"Восток-геолдобыча" ААКы Муса Бажаевдин "Русская платина" мамлекеттик концернинин бир бөлүгү болуп саналат.
2010-жылы өкмөт "Жерүйалтын" ЖАКка Жерүй кенин иштетүү укугун берген лицензиясын жокко чыгарган. Анын 60 пайыз акциясы Consolidated Exploration Holdings Ltd (бул компаниянын ээлери казакстандык Visor холдинги эсептелет) компаниясына таандык. Калган 40 пайызы мамлекеттик "Кыргызалтын" ишканасына таандык. Лицензия жокко чыгарылгандан кийин аткаминерлердин мыйзамсыз аракеттери Кыргызстандын сотторунда каралган. 2012-жылы "Жерүйалтын" ЖАК Вашингтондогу Инвестициялык талаш-тартыштарды жөнгө салуучу эл аралык борборго арыз менен кайрылган. Келтирилген чыгым үчүн аталган компания Кыргызстандан 548 миллион доллар талап кылууда. Аталган иш боюнча сот ушул жылдын ноябрь айына белгиленген.
