БИШКЕК, 17-июнь — Sputnik. Темир Сариев Ички иштер министрлигине, Дене тарбия жана спорт агенттигине, ошондой эле КР Футбол федерациясына Кыргызстан-Австралия оюнун уюштуруудагы кемчиликтерди териштирүүнү жана мындай абалга жол берген бардык жетекчилер менен кызматкерлерди жоопко тартуу маселесин кароону тапшырганын өкмөттүн маалымат кызматы билдирди.
Беттештин жүрүшүндө Кыргызстандын курама командасы татыктуу оюн көрсөтүп, жалпы кыргызстандыктарды биримдикке чакырууда маанилүү окуя болду.
Тилекке каршы, оюнду уюштурууда айрым кемчиликтерге жол берилип, уюштуруучулар күйөрмандарды стадионго киргизүү жана кошумча орундуктар менен камсыз кылуу чараларын ойлонгон эмес. Мындан улам Кыргызстан жана Австралиянын футболдук беттешин көрүүнү каалап, билет алган бир катар күйөрмандар оюнга кире албай калды.
Буга байланыштуу Темир Сариев Ички иштер министрлигине, Дене тарбия жана спорт агенттигине жана КР Футбол федерациясына түзүлгөн кырдаалдагы кемчиликтерди териштирүүнү жана мындай абалга жол берген бардык жетекчилер менен кызматкерлерди жоопко тартуу маселесин кароону тапшырды.
"Өкмөт башчысы Дене тарбия жана спорт агенттигине жана КР Футбол федерациясына мындай жагдай кайталанбашы үчүн күйөрмандардын коопсуздугу жана стадиондун өткөрмө мүмкүнчүлүктөрү боюнча маселелерин иштеп чыгуу тапшырмасын берди", — деп айтылат билдирүүдө.
Учурда бул маселелер боюнча премьер-министрдин Дене тарбия жана спорт агенттигинин жана Футбол федерациясынын жетекчилери менен жолугушуусу пландалып жатат.
