БИШКЕК, 26-май — Sputnik. Президент Алмазбек Атамбаев Кыргызстандын Куралдуу күчтөрүнүн аскер кызматчыларын кесиптик майрамы жана өлкөнүн Куралдуу күчтөрүнүн түзүлгөндүгүнүн 23 жылдыгы менен куттуктады.
"Жолдош жоокерлер жана сержанттар, старшиналар жана прапорщиктер, офицерлер жана генералдар! Урматтуу Куралдуу күчтөрдүн ардагерлери! Сиздерди Кыргызстан Куралдуу күчтөрүнүн түзүлгөндүгүнүн 23 жылдыгы менен куттуктайм", — деди президент Атамбаев.
Ал учурда өлкөнүн коргонуу жөндөмүн чыңдоого, армиябыздын күч-кубатын арттырууга бардык аракеттер көрүлүп жатканын, учурда туруктуулук өкүм сүрүп жаткандыгын айтты.
"Кыргызстаныбызда соңку беш жылдан бери тынчтык өкүм сүрүүдө. Биз тарыхтын тар жол, тайгак кечүүсүнөн өтүп, кайра жаралуу жолуна түштүк. Элибиз эгемендиктин, мамлекеттин баасын терең сезе баштады. Айрыкча, жаштарыбыздын мекенчилдик сезимин көрүп, Кыргызстаныбыздын келечеги кең экенине ишенем", — деди ал куттуктоо сөзүндө.
Атамбаев учурда дүйнө коомчулугун түйшөлтүп турган терроризм кооптуулугун эскертип, жана ага даяр турууга чакырды.
"Азыр дүйнө тынч эмес, Жакынкы Чыгышта, Ооганстанда, Украинада куралдуу кагылыштар токтобой жатат. Эл аралык терроризм деген чек ара тандабасын көрдүк. Чагымчылдыктын, согуштун жаңы түрлөрү пайда болуп жатат. Чагымчылардан, от жаккандардан сак болууга, андайларга жабыла каршы турууга чакырам. Анткени, от жагуу оңой, аны басуу оор экенин билебиз. Ошондуктан, биз Куралдуу Күчтөрдү чыңдоо менен бирге Кыргызстандын элинин биримдигин чыңдашыбыз керек. Элди бөлгөндөр ар кайсы этносторду урууларга, региондорго бөлүп, улутту ойлобойт. Урууну ойлобой, улутту ойлойлу", — деди Атамбаев.
Ал Кыргызстан эч кимдин алдында тизелебестигин, себеби, мамлекетти кайтарган, коргогон Куралдуу күчтөрдүн бардыгын айтты.
