БИШКЕК, 21 мая — Sputnik. Кыргызстандын ИИМ Жол-кайгуул кызматынын жетекчиси Сергей Дьяченко Бишкектин аянтында жайгашкан "Илбирс" имаратынын жөө жүргүнчүлөргө ылайыкталган капталдагы жолунан машина айдап өткөн айдоочунун жөнүн тактоону убада кылды.
Буга чейин reporter.akipress сайтына окуяга күбө болгондор жарыялаган видеодо Т 60 017 кызыл дипоматиялык мамномерлүү автомашинасы Ала-Тоо аянтындагы "Илбирс" имаратынын жөө жүргүнчүлөргө арналган жолунан өтүп, ыңгайсыздык жаратканы даана көрүнүп турат.
Sputnik агенттигине берген интервьюсунда Дьяченко аталган көрүнүштө жол эрежеси бузулуп жаткандыгына макул болду.
"Автомобиль кимге таандык экенин аныктайбыз. Ага ТИМнын кызматкерлери менен биргеликте мыйзам чегинде чара көрүлөт", — деп билдирди ЖКК башчысы.
Ал номердеги "Т" тамгасы дипломатиялык иммунитетке ээ болбогон техникалык персоналды түшүндүрөрүн айтты.
"Башкача айтканда, бул — элчиликтерде иштеген Кыргызстандын катардагы жарандары. Жоопкерчилик толугу менен алардын мойнунда. Машина ичиндегилер чет өлкөлүк жарандар болгон күндө да "Т" номери менен алар эч кандай дипломатиялык иммунитетке ээ болбойт", — деп белгиледи Дьяченко.
Ал эми жол эрежесин бузган "D" тамгасы менен башталган кызыл номерлүү айдоочулар менен башкы жол милиционери Тышкы иштер министрлиги иш алып барарын билдирип, бул учурда ЖКК каттоого алып, тийиштүү мекемеге маалымат гана бере аларын белгиледи.
Тышкы иштер министрлиги Sputnik агенттигине эреже бузган машина кайсы дипломатиялык өкүлчүлүккө таандык экендигин тастыктарын билдирди.
