БИШКЕК, 15-май — Sputnik. Кыргызстандын премьер-министри Темир Сариев министрликтер менен ведомстволорго ЕАЭБдин мыйзам жоболору менен ченемдерин түшүндүрүү боюнча калк арасында маалыматтык иш-чараларды жүргүзүүнү тапшырганы туурасында өкмөттүн маалымат кызматы билдирди.
Өкмөт башчысы ЕАЭБдин мыйзам жоболору менен ченемдерин жарандар менен ишкерлер үчүн онлайн тартибинде түшүндүрүү иштерин жүргүзүүчү туруктуу иштей турган маалымат тобун Экономика министрлигинин алкагында эки жума ичинде түзүүнү тапшырды.
"Келип түшкөн суроого жооп эч бир бюрократиялык тоскоолдуксуз, дароо берилиши керек", — деди Сариев.
КРдин Россиядагы элчилигине мигранттар менен жаңы келип жаткан жарандардын арасында РФте жашоо жана ишке орношуу тартиби боюнча түшүндүрүү иштерин бир жума аралыгында уюштуруу, ошондой эле жарандар Россияга өтө турган чек ара жайларында тийиштүү маалыматты жайылтуу тапшырылган.
Эмгек, миграция жана жатштар министрлигине жана Тышкы иштер министрлигине ЕАЭБдин алкагында жарандардын кыймылы жана ишке орношуу жол-жоболору боюнча маалымат камтылган материалдарды бир жумада даярдап, кенен түшүндүрүү иштерин жүргүзүү тапшырмасы берилди.
Россия, Белоруссия жана Казакстан 2014-жылдын 29-майында Астана шаарында Евразиялык экономикалык биримдик жөнүндө келишимге кол коюшуп, ал 2015-жылдын 1-январында күчүнө кирген. Экинчи январда ЕАЭБга Армения кошулду. Ал эми 8-майда Евразиялык экономикалык биримдиктин саммитинде Кыргызстандын ЕАЭБге кошулушу тууралуу акыркы документтерге кол коюлду.
