БИШКЕК, 12-май — Sputnik. Премьер-министр Темир Сариев 11-майда Кыргызстандагы мамлекеттик органдардын маалымат системаларын ЕАЭБдин талаптарына ылайыктоо боюнча кеңешме өткөрдү. Бул туурасында өкмөттүн маалымат кызматы кабарлайт.
8-майда Евразиялык экономикалык биримдиктин биринчи саммитинде Кыргызстандын аталган интеграциялык уюмга кирүүсү боюнча акыркы документтерге кол коюлган.
Транспорт жана байланыш министрлигинин маалыматында, бул жааттагы иш бекитилген план боюнча жүрүп жатат. Бүгүнкү күнгө карата программалык камсыздоо жанакеректүү жабдууларду орнотуу боюнча келишимдер түзүлүп, тиешелүү процедуралар бүттү.
Транспорт жана байланыш министрлигинен Кыргызстандын ЕАЭБге кирүүсүн ратификациялоо мезгилинде маалымат системалары иштей баштарын убада кылды.
Жолугушуунун жүрүшүндө бажы өткөрүү пункттарын тиешешлүү техника менен жабдуу маселеси талкууланды.
Жыйындын соңунда өкмөт башчысы ведомстволорго ЕАЭБдин талаптары боюнча текшерип өткөрүү пункттарындагы маалымат-техникалык каражаттарды ылайыктоо үчүн жабдуу иштерин кыска мөөнөттө бүтүрүүнү тапшырды.
