БИШКЕК, 14-май — Sputnik. Абдырахман Маматалиев Баткен облусуна болгон иш сапары учурунда "Көк-Таш – Ак-Сай – Тамдык" автожолунун абалы менен таанышып, "Ош – Баткен – Исфана" жолун тез арада бүтүрүүнү тийиштүү органдарга тапшырганын өкмөттүн маалымат кызматы билдирди.
Абдырахман Маматалиев ошондой эле, чек ара тозотторунда болуп, укук коргоо органдарынын абалы менен таанышты. Баткен районунун Таш-Тумшук айылындагы милиция бөлүмүнө келген вице-премьер укук коргоо органдарынын ишин өнүктүрүү үчүн бардык тараптан колдоо керектигин айтты.
"Өкмөт Баткен облусундагы укук коргоо органдарынын бөлүмдөрүн күчтөндүрүү үчүн жардам берет. Бул аракеттердин ичинде милициянын ишмердигин жакшыртуу жана алар турган имараттардын документтерин мыйзамдаштыруу бар", — деди ал.
Маматалиев ошондой эле, "Карабак" чек ара тозотунун ачылышына катышып, Баткен облустук ИИБдин кызматкерлери үчүн салынып жаткан 24 батирлүү үйдүн курулушу менен таанышты.
Баткен облусу Тажикстан жана Өзбекстан мамлекеттери менен чектешет. Чек ара тилкесинде такталбаган аймактар көп болгондуктан, чыр-чатактар болуп турат.
