БИШКЕК, 14-апр. — Sputnik. Быйыл Кыргызстанга келе турчу туристтердин санын 150 миң кишиге көбөйтүү пландалып жатат. Мындай маалыматты Маданият, маалымат жана туризм министрлигинин маалымат кызматы билдирди.
Туризм департаментинин директорунун орун басары Улукбек Карымшаков Кыргызстанга келген туристтердин саны жылдан жылга көбөйүп жатканын Sputnik сайтынын кабарчысына билдирди. Маалыматка караганда, 2013-жылы келген туристтердин саны үч миллиондон ашса, 2014-жылы төрт миллионго чукулдаган.
2015-жылы туристтик сезонду ийгиликтүү өткөрүү боюнча иш чаранын планы иштелип чыкканын министрликтен маалымдашты. Ага ылайык, туристтик тармакты өнүктүрүү, жеткиликтүү жана жайлуу туристтик аймакты түзүү, кызмат көрсөтүүнү жакшыртуу, ички жана дүйнөлүк рынокто сапаттуу атаандаштыкка жетишүү каралган.
Белгиленген иш-чараларды аткаруу менен, Кыргызстанга келе турган туристтердин санын 150 миңге чейин жогорулатуу жана ички дүң өнүмүндө туризм тармагынан түшкөн кирешенин көлөмүн 5 пайызга чейин жеткирүү пландалууда.
