БИШКЕК, 5-фев — Sputnik Президент Алмазбек Атамбаев Геология жана минералдык ресурстар боюнча мамлекеттик агенттигинин директору Дүйшөнбек Зилалиевди кабыл алып, тоо-кен өнөр жайындагы маселелерди, кендерди иштетүүгө лицензия берүү тартибин талкуулады.
Жолугушуунун жүрүшүндө мамлекет башчысына мамлекеттик агенттиктин директору өлкөнүн жер казына объектилерин пайдаланууга укук тартуулаган лицензияларды берүү процесстеринин ачыктыгын арттыруу боюнча көрүлүп жаткан чаралар туурасында маалымат берди.
Атамбаев тоо-кендерин иштетүү тармагын өнүктүрүү жана өнөр жай объектилерин ишке киргизүүнүн маанисин белгиледи. Бул тармактар өлкөнүн экономикасын өнүктүрүүгө жана мамлекеттин кирешесин көбөйтүүгө шарт түзөөрүн айтты. Ал өз кезегинде пенсия менен пособиелерди көтөрүүгө, өлкөнүн жарандарынын айлык акыларын жогорулатууга мүмкүнчүлүк берээрин баса белгиледи.
Ушуга байланыштуу президент Геология жана минералдык ресурстар боюнча мамлекеттик агенттиги жергиликтүү өз алдынча башкаруу органдары менен бирдикте калк арасында түшүндүрүү иштерин күчөтүп, потенциалдуу инвесторлор менен тыгыз кызматташып, ошондой эле коррупцияга каршы ишмердикти активдештирүүгө тийиш экендигин белгиледи.
