ЖК оң рулдуу унаа алып келүүгө тыюу салган мыйзам долбоорун колдоду

БИШКЕК, 5-дек — Sputnik. Жогорку Кеңештин депутаттары Кыргызстанга оң рулдуу машиналарды алып келүүгө тыюу салуучу мыйзам долбоорун биринчи окууда жактырышты.

Парламенттин регламентине ылайык, мыйзам долбоору ноябрь айында профилдик комитеттерде каралып, Жогорку Кеңештин кароосуна жөнөтүлгөн. Мыйзам долбоору Ички иштер министрлиги тарабынан демилгеленген.

"2006-жылы оң рулдуу машиналар болгону 6%ды түзгөн. Андан бери алардын саны өсүп, 45,3%га жетти. Оң рулдуу машиналарды алып кирүүгө тыюу салуу керек. Муну менен жол кырсыктарынын санын азайтууга болот", — деген пикирин ички иштер министринин орун басары Рыскулбек Жапаркулов КСДП фракциясынын буга чейин өткөн жыйынында билдирген.

Мыйзам долбооруна ылайык, оң рулдуу машиналарды өлкөгө алып келүүгө толугу менен тыюу салынууда. Башка мамлекеттин, ошондой эле Кыргызстанда өтүп жаткан эл аралык иш-чараларга катышкан оң рулдуу унаалар өлкө аймагына убактылуу киргизиле берет. Ал эми чет элдик жарандардын унаалары 6 айдан ашык эмес мөөнөткө чейин киргизилет. Коммуналдык, айыл-чарба жана жол куруу үчүн керектелген оң рулдуу унааларды алып келүүгө тыюу салынбайт.

Мамлекеттик каттоо кызматынын маалыматына ылайык, өлкө аймагында 1 миллион 73 миң машина каттоого алынган. Анын ичинен 163 миңи — оң рулдуу унаалар. Бул көрсөткүч жалпы көлөмдүн 15,39 пайызын түзөт.