БИШКЕК, 16-янв. — Sputnik. UFC уюмунун башчысы Дэйна Уайт ирландиялык мушкер Конор Макгрегордун жеңил салмактагы UFC чемпиону титулунан ажыратууга ниеттенип жатканын билдирди. Бул туурасында MMA Junkie спорттук-жаңылыктар порталы жазды.
Буга Макгрегордун 2016-жылдын ноябрында UFC титулун багындыргандан тарта ММА беттештерине чыкпай жатканы себеп болууда.
"Эгер Макгрегор сентябрда рингге чыкпаса беттешке чыкпаганына эки жыл толуп, башка мушкерлерге карата адилетсиздик болуп калат. Биз баарыбыз аны жакшы көрөбүз. Бирок мындай учурда кур башка мушкерге өтүшү керек. Учурда чемпиондук кур үчүн Нурмагомедов менен Фергюсонду беттешке чакыруу боюнча иштеп жатабыз", — деп айткан Уайт.
Эгерде анын айткандары иш жүзүнө аша турган болсо анда россиялык Хабиб Нурмагомедов менен америкалык Тони Фергюсон бошотулган кур үчүн үстүбүздөгү жылдын апрель айында күч сынашат.
