Бул күнгө карата Sputnik Кыргызстан Мамлекеттик борбордук архивден алынган кадрларды окурмандарга тартуулайт.
…1991-жылы жайында, тагыраагы августтун аягында Кыргызстанды бир эсе таңгалдырган, бир эсе денени "дүр" эттирген окуя дүң эле дей түштү.
"Илгери репрессия болуп атылып кеткендердин сөөгүн табышыптыр, кайра көөмп жатышыптыр" деген сөз желдей тарап өлкөнүн булуң-бурчуна жетти.
Жарым кылымга жакын катылып жаткан сырды ошол кездеги трагедиянын чек жакасын билип калган кишинин кызы Бүбүйра Кыдыралиева кийин бийликке демократия желаргысы келгенде каргашалуу окуянын чоо-жайын билдирген.
Ал жерде кыргыз элинин каймактары, Кыргызстандагы интеллигенция өкүлдөрү Жусуп Абдрахманов, Баялы Исакеев, Төрөкул Айтматов, Касым Тыныстанов, Эркинбек Эсенаманов, Иманаалы Айдарбеков баштаган адамдар жатат.
"Ата-Бейит" комплексинин жетектөөчү адиси Өктөм Кадырованын айтымында, ошол күндөрү атылгандарды Бишкектин азыркы Токтогул — Панфилов көчөлөрүнүн кесилишиндеги абактан алып келишкен экен.
Алардын ичинен 137 адамдын аты-жөнү такталып, 138-курмандык аял кишинин ким экендиги белгисиз бойдон кала берген. Себеби, казган учурда аялдын кызыл түстөгү кийими жана 37 өлчөмдөгү бут кийим табылган.
Ошентип 1991-жылы 30-августта биздин түшүнүк менен айтканда, алардын ар бири өз-өзүнчө жайга ак кепинделип, бала-чакасынын, элдин, бийликтин катышуусу менен кайрадан көмүлгөн.
Азыр бул жер ошол жайда жаткандардын бири Төрөкул Айтматовдун уулу үлкөн жазуучу Чыңгыз Айтматовдун сунушу менен "Ата-Бейит" деп аталды. Ал жер азыр улуттук тарыхый-мемориалдык комплекс.
