Тоо түбүндөгү "Ата-Бейит". Трагедиялуу тагдырлар, ата-бала Айтматовдор жаткан жай

Жазылуу
Бишкектен түштүктү көздөй 30 чакырым алыстыкта, Чоң-Таш деп аталган айылдын жанында "Ата-Бейит" улуттук тарыхый-мемориалдык комплекси жайгашкан. Аталган комплекстин тарыхы өзүнчө бир трагедиялуу окуялардан турат.

Sputnik Кыргызстан "Кыргызстандагы кыя өтпөй турган жерлер" деп аталган рубриканын алкагында окурмандарга, көрөрмандарга "Ата-Бейит" тууралуу видео материалды тартуулайт.

Бул жерден балдарын ээрчитип, үй-бүлөсү менен жүргөн бишкектиктер жана республиканын ар тарабынан келген кыргызстандыктарды кездештирүүгө болот. Андан сырткары, ал жердин тарыхын түшүнүп-түшүнбөй, улам суроо салган туристтердин аягы үзүлбөйт.

"Ата-Бейиттин" ичинде ири төрт комплекс бар. Ал үч гектарга жакын аймакты ээлейт.

Чон-Таш айылындагы Ата-Бейит мемориалдык комплекси. Архив - Sputnik Кыргызстан
"Ата-Бейит": жарым кылым ың-жыңсыз жаткан кайрандар. Чүкөдөй кемпир ачкан чындык
1937-38-жылдардагы репрессиянын курмандыктарына арналган мемориалдык комплекс. Бул жерде 138 адам, тагыраагы кыргызстандын ошол кездеги каймактары жатат. 1930-жылдардагы интеллигенция өкүлдөрүнүн сөөгү кайрадан көмүлгөн.

1916-жылдагы Үркүн трагедиясына арналган мемориалдык комплекс. Ал былтыр 2016-жылы улуу Үркүн трагедиясынын 100 жылдыгына карата орнотулган.

Улуу жазуучу Чыңгыз Айтматовдун мемориалдык комплекси. Кара сөз чеберинин сөөгү 2008-жылы июнь айында атасы Төрөкул Айтматовдун жайына жакын коюлган.

2010-жылдагы Апрель революциясынын баатырларына арналган мемориалдык комплекс. Мында саясий окуянын курмандыгы болгондордун ичинен 27 адамдын сөөгү жашырылган.

Бул жердин тарыхын келгендерге баяндап берген аймакта музей бар. Ал негизинен 1938-жылы бейкүнөө репрессиялангандардын трагедиялуу тарыхын чагылдырган экспонаттардан турганы менен калган комплекстер туурасында кызыксаңыз, кеңири маалымат алсаңыз болот.

Аймакка кире берээрде сизди Улуттук Гвардиянын жоокерлери коопсуздук үчүн текшерсе, коркуп кетпеңиз. Комплекске акысыз кирип, зыярат кылып, таанышып чыксаңыз болот. Ал эми музейге кирүү акысы — 10 сом.

Жаңылыктар түрмөгү
0