БИШКЕК, 28-апр. — Sputnik. Кыргызстандык мушкер Дастан Али Шаршеев менен россиялык спортчу Антон Калининдин реванштык беттешине даярдык көрүлүп жатат. Бул тууралуу Sputnik Кыргызстан агенттигине TNA турниринин спорттук директору Василий Флейшер билдирди.
Анын айтымына караганда, реванштык жолугушуунун так убактысы азырынча белгисиз. Бардык жагдайлар эки тарап менен сүйлөшүлүүдө.
"Өткөндөгү беттеш коомчулукта резонанс жараткандыктан, эки спортчуну кайрадан жолугуштурууну пландап жатабыз. Биринчи беттештеги судьялардын чечими өзгөртүүсүз калат", — деди Флейшер.
Антон Калинин менен реванштык беттеш өтө турганын кыргызстандык спортчу дагы өзүнүн Instagram баракчасына жарыялады.
"Биз TNA уюму менен биргеликте таймаш өткөрүүнү чечтик. Антон Калинин менен эки айдан кийин кайрадан беттешем", — деди Дастан Али Шаршеев.
Кийинчерээк Россиянын спорттук калыс агенттигинин башчысы Игорь Демидов бул окуя боюнча өз пикирин жарыялаган. Ал өз сөзүндө ар кыл өлкөлөрдүн калыстарынан турган комиссия түзүп, адилет чечим чыгарып, андан сырткары Шаршеев менен россиялык спортчунун таймашына калыстык кылган реферилер бригадасы менен териштирүү жасоону айткан.
