БИШКЕК, 5-апр. — Sputnik. Кыргызстанда өткөрүлгөн тойлордун убактысын үч саат кылып кыскартуу керек. Бул тууралуу КР эл артисти, мурунку маданият министри Түгөлбай Казаков Sputnik Кыргызстан агенттигинин мультимедиалык борборунда өткөн тегерек столдо айтты.
"Жүрөк оорутпай кантип той берсе болот" аттуу иш-чарага КР эл артисти Жамал Сейдакматова, куудул, тамада Борончу Кудайбергенов, Эркин Рыскулбеков, ЖК депутаты Эмил Токтошев, "Ыйман" фондусунун жетекчиси Нуржигит Кадырбеков, "Кереге" коомдук уюмунун төрагасы Искендер Ормон уулу катышты.
Казаковдун айтымында, тойлордун форматын өзгөртүү үчүн атайын эрежелер иштелип чыгышы зарыл.
"Бул, биринчиден, келе турган мейман кечигип келбеши керек. Бул дагы эреже болушу кажет. Анткени кечиккендердин айынан той 1-2 саатка кеч башталат, бул канча деген кишинин убактысын алууда. Той ээсин, башкаларды сыйлабагандыкка жатат. Экинчиден, кыргыздын дилине жат, башка элден сиңирилген ашыкбаш каада-салттардан баш тартуу керек. Үч саатта той өтүп бүтөт. Кыргыздын аш-той өткөрүү салты эбакта эле негизделип, эрежелери иштелип чыккан. Ар бир той, кандайдыр бир иш-чара өзүнүн эрежеси, багыты менен өтүп келген", — деди экс-министр.
Эске салсак, мурдагы депутат Аида Салянова башында турган депутаттык топ тойлордогу шаан-шөкөткө, ысырапкорчулукка жол бербөө максатында иштеп чыккан мыйзам долбоорго 70 депутат "каршы", 42 депутат "макул" деген добуш бергени үчүн өтпөй калган. Долбоорго ылайык, эң ири той деп эсептлеген үйлөнүү үлпөтү 150 мейман менен чектелмек.
Буга чейин тегерек столго катышкан Жогорку Кеңештин депутаты Эмил Токтошев аталган мыйзам долбоору эмнеге өтпөй колгонун айтып берген.
