БИШКЕК, 13-окт. — Sputnik. Мэр Албек Ибраимовдун буйругу менен Бишкектеги үйлөргө жылуулук 17-октябрдан тарта бериле турганын шаар муниципалитети билдирди.
Маалыматка ылайык, кечээ өткөн жыйында "Бишкек жылуулук энерго", "Бишкек жылуулук түйүнү" коммуналдык ишканалары жана ТЭЦ алдыдагы сезонго толугу менен даяр экени белгилүү болгон.
Ал эми Кыргызгидрометтин тараткан билдирүүсү боюнча 18-октябрдан тарта абанын температурасы 3 градуска чейин төмөндөп, жамгыр жаап, карга айланат.
Объектилерге жылуулук берүү бир нече күнгө уланышы мүмкүн. Биринчи кезекте жылуулук мектепке, бала бакчаларга, ооруканаларга, төрөт үйлөрүнө берилмекчи. Андан соң турак үйлөр жана жылуулук үчүн карызы жок өнөр жай ишканалары кошулат.
Эскерте кетсек, былтыркы жылы жылуулук 14-октябрда берилген.
