БИШКЕК, 5-дек. — Sputnik. Түрк тилдүү мамлекеттердин парламенттик ассамблеясынын (ТүркПА) VII пленардык жыйыны Бишкекте өтө турганын Жогорку Кеңештин маалымат кызматы билдирди.
Мындай чечим Астанада өткөн VI жыйында белгилүү болду. Ага ЖК төрагасы Асылбек Жээнбеков менен парламенттин бир катар депутаттары катышты.
Иш-чарада ТүркПАнын социалдык, маданий жана гуманитардык маселелери боюнча комиссиясын депутат Садык Шер-Нияз жетектесе, ал эми анын кесиптеши Дастан Жумабеков ассамблеянын экономикалык кызматташуу боюнча комиссия төрагасынын орун басары болуп дайындалды.
Жыйын соңу менен Астана декларациясы кабыл алынып, кийинки чогулуш 2016-жылдын экинчи жарымында Бишкек шаарында өтө турганы аныкталды.
