БИШКЕК, 1-ноя. — Sputnik. Түркиядагы госпиталдардын биринде комада жаткан 22 жаштагы кыргызстандык кызды ошол жердеги мамлекеттик ооруканалардын бирине которуу боюнча КРдин Түркиядагы элчилиги сүйлөшүүлөрдү жүргүзүп жатат. Бул туурасында ТИМдин маалымат кызматынан кабарлашты.
"Комада жаткан кыздын энесинин кайрылуусунан кийин Түркиядагы Кыргызстандын элчилиги тез арада аталган мамлекеттин саламаттык сактоо министри менен байланышкан. Учурда кызды мамлекеттик ооруканалардын бирине жайгаштырып, дарылоосун андан ары жеңилдик же акысыз түрдө улантуу боюнча сүйлөшүүлөр жүрүп жатат", — деп билдиришти маалымат кызматынан.
Элчиликтен бул маселени көз жаздымда калтырбай, улам карап турушарын айтышкан.
