БИШКЕК, 6-авг. — Sputnik. Бишкекте милиция балдар паркында сатуучу кызды калькулятор менен башка чапкан кишини кармады. Бул тууралуу Октябрь РИИБинин маалымат кызматы кабарлады.
Буга чейин окуянын видеосу социалдык тармактарга тараган. Ал видео байкоо камерасына түшүп калган.
Милициядан билдиргендей, окуя 2-август күнү Горький жана 7-Апрель көчөлөрүнүн кесилишиндеги соода борборунда болгон. Арыз жазган кыздын айтымында, ал күнү бейтааныш эркек киши мас болуп алып, аны менен урушуп, сөгүнгөн. Чатакташып жатканда калькулятор менен башка чаап салган.
Милиция чыр салган киши 29 жаштагы А.А., экенин аныктап, Октябрь РИИБинин жорук иштери боюнча бөлүмүнө алып келген.
Мындан тышкары, кыздын алган жаракатынын оордугун аныктоо үчүн соттук-медициналык экспертиза дайындалган. Бирок жабырлануучу ден соолугуна өтө чоң зыян келбегенин айтып, экспертизадан өтүүдөн баш тартканы белгиленди.
Тергөө иштери уланууда.
Бул окуя боюнча Россиянын Кыргызстандагы элчиси Николай Удовиченко Instagram баракчасы аркылуу үн катты.
"Тынчтыкты жана улуттар аралык ынтымакты сактоого салым кошпогон, анын ичинде улуттук кастыкка негизделген агрессивдүү аракеттерди айыптабай кое албайбыз", — деген дипломат.
Ал кыргыз бийлигине "окуяга адекваттуу баа берүү боюнча" кайрыларын кошумчалаган.
