7-августта кечки саат 20.00дөр чамасында УКМКнын атайын даярдыктагы аскерлери Алмазбек Атамбаевдин Кой-Таштагы үйүн басып киришкен. Бирок мурдагы президентти кармай алышкан жок. Анын тарапташтары да катуу каршылык көрсөтүп, күч түзүмдөрү менен кагылышкан учурлар катталды. Андан соң Атамбаев бийликке кайрылуу жасап, баскынчылык кадамдарды токтотууга чакырды.
Акыркы маалымат боюнча атайын операция учурунда ок атылып, 45 киши түрдүү жаракаттарды алган. Спецназдын бир жоокери ооруканада каза болду. Ал эми Чүй облустук милициянын жетекчиси Самат Курманкулов башынан жаракат алып, жандандыруу бөлүмүндө жатат.
Саламаттык сактоо министрлигинин берген маалыматы боюнча башынан жабыркагандар — 22, желим ок жегендер — 13, аскерий ок тийгендер — 4, денесинин ар жеринен жаракат алгандар — 2, денеси сыйрылгандар — 4.
УКМК аскерлер желим ок гана колдонгонун, Атамбаевдин үйүнөн аскерий октор атылганын билдирүүдө.
Кырдаалга байланыштуу бүгүн, 8-августта, президент Сооронбай Жээнбеков Коопсуздук Кеңешинин жыйынын өткөрөт. Ал эми Жогорку Кеңештин депутаттары кезексиз сессияга чогуулары маалым болду.
Атышуудан жабыркагандардын саны 43кө жетти.
Президент Сооронбай Жээнбеков 8-августта Коопсуздук кеңешинин жыйынын өткөрөт. Бул тууралуу мамлекет башчысынын маалымат кызматы билдирди.
Жээнбеков 7-августта өзүнүн кыска мөөнөттүү эмгек өргүүсүн токтотуп, Бишкек шаарына келген.
Саламаттык сактоо министрлигинин саат 00.55ке карата берген маалыматы боюнча атышуудан 36 киши жабыркаган. Анын 15и — күч структураларынын өкүлдөрү.
Борбордогу ооруканадан Кой-Таштагы кырдаалдан жаракат алган атайын даярдыктагы бөлүктүн аскери каза тапты. Бул туурасында Sputnik Кыргызстан маалымат агенттигине шаардык травмотология жана ортопедия илим изилдөө борборунунун жетекчиси Сабырбек Жумабеков билдирди.
Анын айтымында, аскер жүрөгүнө ок жеген.
Учурда Sputnik агенттигинин кабарчысы Бишкек травмотология жана ортопедия илим изилдөө борборунда жүрөт. Анын айтымында, ооруканага ар кандай жаракат алган адамдарды алып келишүүдө.
Ушу тапта Кой-Таштагылар менен байланышууга мүмкүн болбой жатат.
Ал арада ооруканаларда жаткан жабырлануучулардын саны 15ке жетти.
Министрлик бир адам каза болду деген маалыматты четке какты.
Аймакка жарык берилип, байланыш жок болуп жатканы айтылды.
Россия президенти Владимир Путин Кой-Ташта мурдагы президент Алмазбек Атамбаевди кармоо иши тууралуу маалымат алды. Бул туурасында РИА Новости жазды.
"Президент Кыргызстанда мурдагы президент Алмазбек Атамбаведин айланасында болуп жаткан окуя тууралуу кабардар болду", — дешти өлкө башчынын маалымат кызматынан.
Путин соңку кабарларды калтырбай, окуяга көз салып жатканы айтылат.
Ал арада Фарид Ниязов түзүлгөн кырдаал бийликтин провокациясы экенин айтты.
Саламаттык сактоо министрлиги саат 22.50гө карата берген маалыматында 1 аскер жаракат алганын билдирди. "Үйдүн ичинен атышып, спецназ төшүнө ок жеген. Ок бронежилетти тешип өткөн" деп айтылат маалыматта.
Ал арада УКМК спецназдын жоокерлери багынып берди деген маалыматты четке какты.
Үйдүн ичине кирип баран Атамбаевдин тарапташтары спецназдын жоокерлерин ур-токмокко алганы айтылды.
Ушу тапта спецназдын жоокерлери сабалып жатканы айтылды. Эл "Атамбаев!" деп кыйкырып жатат.
Жарадар болгондордун саны 10го жетти. Бул тууралуу Саламаттык сактоо министрлиги билдирди. Чүй облустук ооруканасында үч жабырлануучу жатат. Экөө көкүрөк тушуна желим ок тийсе, бирөөнүн баш мээси чайкалган. Улуттук госпиталда желим октон колу менен көзү жабыркап бир киши жатат. Ал эми Бишкек травматология жана ортопедия илим изилдөө борборунда алты киши дарыланууда. Бир адам операцияга киргизилди. Калгандарынын абалы орто туруктуу деп бааланууда.
Ушу тапта Атамбаевдин тарапташтары үйдүн терезелерин талкалап ичине киришти. Алар бронежилет менен калкаланып киргени айтылууда. Үйдө жарык өчүрүлдү.
Эмгек өргүүсүндө жүргөн президент Сооронбай Жээнбеков Бишкекке келе жатканы айтылды.
Саат 22.08ге карата УКМК Атамбаевди кармоо операциясы уланып жатканын билдирди.
Саламаттык сактоо министрлиги октон дагы беш киши жабыркаганын айтты. Жарадарларды Бишкек травматология жана ортопедия илим изилдөө борборуна алып кетишти.
Атамбаевдин үйүнүн айланасы өрттөнүп жатканы айтылды. Камыш менен чөп күйүп жатат.
Кой-Ташка сегиз тез жардам бригадасы чыгып кеткенин Саламаттыкты сактоо министрлиги билдирди.
Атышуу болуп жатат.
Коомчулукта Алмазбек Атамбаевге таандык деп айтылып келген "Апрель" телеканалы көрсөтүлбөй калганы айтылды. Бул маалыматты канал Facebook баракчасы аркылуу тастыктап, "телеканалды болгон жерде өчүрүштү, Кой-Таштагы түз берүүлөрдү социалдык тармактагы баракчабыздан гана көрө аласыздар" деп жазышкан.
Келген элдин саны барган сайын көбөйүүдө. Азыр Кой-Ташка Равшан Жээнбеков келди. Бирок жол тосулгандыктан кире албай турат.
Жергиликтүү эл дубалды талкалап, короонун ичине кирүүгө аракет кылып жатышат.
Жарадар болгон адамды алып кетип бара жатышат.
Жабырлануучуларды Чүй облустук ооруканасы, Улуттук госпиталь, Бишкектеги травматология жана ортопедия илим изилдөө борбору кабыл алууга даяр.
Чүй облустук Тез жардам кызматына саат 20:20да билдирүү келип түшкөн. Окуя болгон жерге Чүй облустук Тез жардам бригадасынан беш машина жана Бишкек шаарынан кошумча үч бригада кеткен.
Атамбаевдин үйүнүн боюндагы трассада дөңгөлөктөр күйүп жатат
Атамбаевдин үйүнүн жанында ок атышуу уланып жатат.
Дагы деле октун үнү угулуп жатат. Атамбаевдин 100гө чукул тарапташтары короонун сыртында колуна таш кармап каршылык көрсөтүүдө.
Видеодон жол боюндагы чоң эки бакты кыйып түшүрүп жаткандарды көрүүгө болот. Кулаган бак аз жерден бир кишини басып кала жаздады.
Ушу тапта үйгө тез жардам кызматынын унаасы келди.
Ушу тапта ок дале атылып жатат.
Атамбаевдин кол тийбестиги алынгандан кийин ал жашаган Кой-Таш айылындагы үйүндө тарапташтары тарабынан "Элдик штаб" уюштурулган. Ал жерде тарапташтарынын, саясаттагы үзөңгүлөштөрүнүн, партиялаштарынын жана элдин аягы үзүлбөй келген.
Ушу тапта Кой-Ташка кирген жол эки тарабынан жабылганы айтылды. Ал арада 24.kg сайтынын журналисти Аида Жумашева да бутуна ок жеди.
Ушу тапта короонун сыртында келген элге карай ок атылып жатканы айтылды.
КСДП төрагасынын орун басары, ЖК депутаты Асел Кодуранова менен байланышканыбызда, ал Кой-Ташка жөнөгөнүн, азырынча эч кандай маалыматы жок экенин айтып берди.
Атамбаевдин үйүнүн үстүнөн вертолет учуп өттү. Ал кандай тик учак экени азырынча белгисиз.
Жарадар болгон адамдар жерде жатат, атайын кызматтын аскерлери өзүлөрү медициналык жардам көрсөтүүдө. Жарадар болгондорго караганда адамдарды желим ок менен атышкан. Бул тууралуу түз эфирде да сүйлөп жатышат.
Эске салсак, Жогорку Кеңеш Алмазбек Атамбаевди кол тийбестигинен ажыраткан. Башкы прокурор Өткүрбек Жамшитов парламенттеги депутаттык комиссия койгон алты күнөөнүн бешөө негиздүү экенин ырастап, бул боюнча өзүнүн корутундусун дагы билдирген.
Буга чейин Батукаевдин өлкөдөн мыйзамсыз чыгып кетиши боюнча козголгон иштин алкагында Алмазбек Атамбаев күбө катары үч жолу суракка чакырылган, бирок экс-президент "бийлик алгач укуктук талаага келсин" деп барбай койгон. Кийинчерээк ал адвокаты аркылуу кат түрүндө жооп берүүгө даяр экенин билдирген.
Октун үнү да угулуп жатат, атайын кызматтын кызматкерлерине жакындаган адамдарга курал кезеп жатышат.
Түз эфирде сүйлөгөндөр тез жардам кызматын үйгө киргизбей жатканына нааразы болуп жатышат.
Социалдык тармактан түз алып берип жаткан Кундуз Ажибекованын видеосунан аскерлер короонун ичинде жүргөнү көрүнүп турат. Ок атылып жатат. автордун атымында, ондой киши жарадар болду. Арасында экс-депутат Мээрбек Мискенбаев дагы бар.
Атышуу тууралуу маалымат Аламдүн РИИБине түшкөн. Милиция кызматкерлери азыр Кой-Ташка жөнөп кеткени айтылды.
