БИШКЕК, 8-авг. — Sputnik. Мурдагы президентти кармоо операциясы боюнча Жогорку Кеңештин депутаттары кезексиз жыйынга чогулат. Бул туурасында парламенттин маалымат кызматынын жетекчиси Ибраим Нуракун уулу билдирди.
Ал төрага Дастан Жумабеков менен сүйлөшкөнүн белгилеп, 8-августта парламенттин жыйыны өтөрүн айтты. Убактысы такталып жатат.
Мындан сырткары, вице-спикер Аида Касымалиева да билдирүү таратып, кесиптештери отурумга келе турганын ырастаган.
"Кыргызстандын мурунку президенти Алмазбек Атамбаевди кармоо иши мыйзам чегинде ишке ашуусу керек. Кандай болгон күндө да карапайым эл жабыр тартуусуна эки тарап тең жол бербеши абзел! Регламент боюнча 40тан кем эмес депутат кол коюшу керек. Биз кийинки муундар үчүн, жаркын келечегибиз үчүн бардык иш-аракеттер мыйзам чегинде болуусун көзөмөлдөөгө тийишпиз жана милдеттүүбүз", — деп билдирген Касымалиева.
Буга чейин 8-августта Сооронбай Жээнбеков да Коопсуздук кеңешинин жыйынын өткөрө турганы кабарланган.
Белгилей кетсек, 7-августта УКМКнын атайын даярдыктагы аскерлери мурдагы президент Алмазбек Атамбаевдин Кой-Таштагы үйүн басып киришкен. Анда ок атылып, 36 киши түрдүү жаракаттарды алган. Акыркы маалымат боюнча, алган жараатынан бир жоокер ооруканада каза болду.
