Окуя 2014-жылы 27-март күнү кечке жуук Токмок шаарындагы кичирайондордун биринде болгон. Руслан Абасов айдап бара жаткан Toyota Land Cruiser унаасы жарылып, спортчу алган жаракатынан улам ооруканада эсине келбей үзүлгөн. Бул факты боюнча Кылмыш жаза кодексинин 97-беренеси ("Адам өлтүрүү") менен иш козголгон. Иликтөө айдоочу отурган отургучтун алдына жардыруучу зат катылганын тастыктаган. Бүгүнкү күнгө чейин спортчуну өлүмүнө кириптер делген адамдар табылбай келет. ИИМ болсо иликтөө иштери жүрүп жатканын гана байма-бай эскертип турат.
Sputnik Кыргызстан маалымат агенттиги спортчуну эскерүү максатында Руслан Абасовдун жубайы Айчүрөк Алисопиева жана машыктыруучусу Александр Воинов менен маектешти. Ошондой эле ИИМден бул боюнча иштер кандай жүрүп жаткандыгына кызыкты.
Алгач спортчу тууралуу учкай кеп
Руслан Абасов 1976-жылы 15-ноябрда Токмок шаарында туулган. Токмок техникалык институтунун экономика факультетин аяктаган. Спорттун алгач күрөш, бокс, ушу-саньда түрлөрү менен машыгып жүрүп, кикбокска толугу менен өткөн.
Бою 196 сантимиметр болсо, күчкө толуп турганда салмагы 115 килограмм болгон. Рингге "Гермес" каймана аты менен чыккан.
Спорттогу жетишкендиктери:
- 1996-жылдан тарта "Гермес-Профи" клубунун тарбиялануучусу;
- 1997-2005-жылдары КРдин курама командасынын мүчөсү;
- Кикбокс боюнча эл аралык класстагы спорт чебери, КРдин эмгек сиңирген спорт чебери;
- Кикбокс боюнча спорт сүйүүчүлөр арасында дүйнөнүн 2 жолку (1999, 2003) жана Азиянын бир жолку (2003) чемпиону;
- "Барс" версиясы боюнча Дүйнө кубогун уткан (2002);
- Кикбокс боюнча профессионалдар арасында эки жолку Евразия чемпиону (2003, 2008);
- WBKF версиясы боюнча профессионалдар арасында дүйнө чемпиону (2005);
ИИМдин жообу мурдагыдай...
Ички иштер министрлигинин маалымат кызматынын өкүлү Эрнис Осмонбаев Руслан Абасовдун иши боюнча коомчулукка айта турчу жаңы версиялар жок экендигин билдирип, кененирээк комментарий берүүдөн баш тартты.
"Тергөө иштери жүрүп жатат. Буга чейин да жүрүп келген. Элге айта турчу жаңы маалыматыбыз жок. Спортчунун өлүмү боюнча көптөгөн версиялар айтылып, алар текшерилип келет", — деди Осмонбаев.
Ал ошондой эле тергөөнүн кызыкчылыгына байланыштуу айрым нерселер ачыкталбай турганын кошумчалады.
Воинов: Русландын өлүмүн эстөө оор
Руслан Абасовду кикбостагы бийик даражаларга жеткирип, жашоодо аталык да милдетин аткарган машыктыруучусу Александр Воинов алгач окуучусу менен кантип таанышып калганын айтып берди.
"Мен аны алгач 9-класста окуп жүргөндө көрдүм. Узун, арык, эч кимге байкалбаган, анан күлкүлүү бала эле. Башында Токмокто машыгып жүрчү, кийин шаарга алып келип алдым. Машыгууларын калтырбаган, тил уккан, тартиптүү бала болчу. Барган сайын салмагы өсө берди. Руслан клубдан күчтүү спарринг-өнөктөштөр менен машыкты. Алгач 75 килограмм кезинде Малик Борбашев менен, 80 килограмм кезинде Али Порсуков менен, 90 килограмм болгондо Ануар Ибраев аттуу кикбоксчулар менен машыккан. Алар Русланды аячу эмес. Натыйжада аны рингде чыдамкай, эр жүрөк болууга үйрөтүштү. Кийин салмагы 115 килограммга чейин өстү, бою эки метрдей болчу", — деди машыктыруу.
Воинов Абасов күйөрмандын эсинде супер оор салмакта мыкты беттештерди тартуулаган кикбоксчу катары эсте калганын белгилеп, ал карьерасын аяктагандан кийин эмне менен алектенгенин айтып берди.
Воинов тарбиялаган окуучусунан ажыраган күндү эстөө кыйын экендигин айтып берди.
"Жашоо деген ушундай экен, биз аны жоготуп алдык. Окуя болгон жерге жетип барып, аны жарылгандан кийинки абалын көрүү кыйын эле болду. Өлүкканадан жууп-тазалап беришти. Мен көргөн нерсени эч ким көрбөгөн чыгар. Ал учурду элестетүү оор. Русландын өлүмү тууралуу ар кандай пикирлер айтылды. Курулай бирөөнү күнөөлөө да болбойт. Мен бул кылмыштын бетин ачуу мүмкүн болбой жатат дегенге ишенбейм. Себеби адамды жардырып жиберүү деген окуя өтө сейрек. Күнөөлүүлөр табылып, жазасын аларына ишенебиз", — деди Воинов.
Ал жыл сайын Токмокто Руслан Абасовдун элесине арналып эл аралык мелдеш өтүп турарын кошумчалады.
Спортчунун жубайы: ИИМди Кашкар Жунушалиев келгенден бери аттай элекмин
Маркум Руслан Абасовдун жубайы Айчүрөк Алисопиева менен да байланышууга мүмкүнчүлүк болду. Бирок ал жолдошу тууралуу кенен айтып берүүгө психологиялык жактан даяр эместигин белгилеп, үстүртөн жооп берип, өзүнүн жана балдарынын сүрөтүн жиберген жок. Ошондой эле буга чейин журналисттер менен маектешүүгө макул болбой келгенин белгиледи.
Алисопиева күйөөсүнүн кылмыш иши узап кеткенин, али күнгө чейин күнөөлүүлөр табылып каларынан үмүтү чоң экендигин кеп кылды. Ал Кашкар Жунушалиев 2016-жылы Руслан Абасовдун өлүмүнө шектүүлөр бар экендигин айтып, бирок бул маалымат кийин туура эмес болуп чыкканын айтып берди.
"Руслан өлгөн убакта ИИМде эле "жашап" калгам. Посттогулар паспорт сурабай киргизип калган. Кайрылбаган жерим калган эмес. Президентке чейин кат жолдогом. Ар кандай версиялар айтылып, ошолор боюнча чуркап жүрдүк. Андан бери канча министр алмашты. Бирок мен Кашкар Жунушалиев келгенден бери министрликке кире элекмин. Мен ал кишиден түңүлгөн жайым бар. 2016-жылы кызматка жаңы орношуп, маалымат жыйын берип жатканда Русландын өлүмүнө буйрутма берген шектүү адамдар бар деп айткан. Мен эртеси Жунушалиевге жолугайын деп барсам, орун басары Мирлан Каниметов "ал (министр — ред.) адашып, туура эмес сүйлөп алыптыр, кылмышка шектүүлөр жок" деди. Кантип бакыйган адам ушинтип айтканын төгүндөп коет? Ошондон кийин эшигин аттаган жокмун. Бирок бир күнү күнөөлүүлөр табыларына ишенем", — деди спортчунун жубайы.
Айчүрөк Алисопиева жолдошунун өлүмүнө эмне себеп болгону өзүнө да табышмак экендигин айтып берди.
Ал маектин соңунда балдары тууралуу кеп кылды. Жубайлардын улуу баласы Темирлан 15, кызы Лейла 12, ал эми кичүү уулу Руслан 8 жашка чыгып калган экен. Бардыгы тең түрк лицейинде билим алышат. Айчүрөк Алисопиева чакан ишкерлик менен алектенип үй-бүлөсүн багат. Кайын журту менен жолдошу тирүү кезде эле катышкан эмес.
