Иранда кыйраган учактагы эт кимге тиешелүү эле? Жүктүн ээси табылды

© AFP 2023 / HASAN SHIRVANI / MIZAN NEWSКрушения самолета, летевшего из Бишкека в Иран
Крушения самолета, летевшего из Бишкека в Иран - Sputnik Кыргызстан
Жазылуу
Иранда кырсыктаган учакты эт экспорттогон ишкана алгачкы жолу жалдаган.

БИШКЕК, 14-янв. — Sputnik. Иранда кырсыктаган учак алып бара жаткан эт Кыргызстанда каттоодон өткөн "Навидист" ЖЧКсына тиешелүү болгон. Маалыматты Sputnik Кыргызстандын кабарчысына Ветеринардык жана фитосанитардык коопсуздук мамлекеттик инспекциясынын маалымат катчысы Рахат Садырбекова тастыктады.

"Навидист" ишканасы бир нече жылдан бери тоңдурулган кой этин Кыргызстандан Иран мамлекетине экспорттоп жүрөт. 2017-жылы — 146 тонна, 2018-жылы 786 тонна кой эти жөнөтүлгөн. Бул жолку 30 тонна этти жиберүүгө компания 2019-жылдын 11-январь күнү уруксат кагазын алган", — деп айтылат билдирүүдө.

Юстиция министрлигинен каттоодон өткөн ишканалар тууралуу маалыматтар жайгаштырылган osoo.kg порталында "Навидист" ЖЧКсын Патан Салим Ахемед жана Моради Хасан Голамхоссеин (жетекчи) аттуу жарандар негиздегени айтылат. Мындан улам ушул эле порталда жетекчиликтин байланыш телефону катары көрсөтүлгөн номерге чалып, Моради Хасан Голамхоссеин мырза менен сүйлөштүк.

Бишкектен чыгып Тегеранда кулаган учак - Sputnik Кыргызстан
Иранда кыйраган учак боюнча кыргыз өкмөтү үн катты
Анын айтымында, кыйроого учураган учакты алар убактылуу гана жалдашкан.

"Биздин ишкана негизи башка компаниянын кызматын колдончу. Бул жолу 30 тоннадой эт даярдап алсак, ал учак бузулуп калганын айтышты. Андыктан убакытты өткөрүп ийбейли деп азыркы аскердик учакты жалдаганбыз. Товар иран аскерлерине жиберилген деген маалымат жалган. Мен бир жылдан бери эт ташуу менен алектенем", — деди жетекчи.

Сөзүнүн аягында ал Кыргызстанда жашарын айтканы менен кайсы өлкөнүн жараны экенин ачыктаган жок.

Баса, ирандык журналисттердин бири өзүнүн Twitter баракчасына кыйраган учакта жарым-жартылай күйүп калган койдун эти чогултулган сүрөттөрдү жарыялады. 

​Эске салсак, Бишкектен учуп чыккан Boeing 707 жүк ташуучу учагы Тегеранга жакын жерге кулап түшкөн. Кийин учак эт ташып бара жаткандыгы белгилүү болгон

Жаңылыктар түрмөгү
0