900 миң доллар... УКМК Зилалиевдин каткан байлыгын санап берди

БИШКЕК, 10-дек. — Sputnik. Мамлекеттик кызматта иштеп келген Дүйшөнбек Зилалиевдин банктагы жеке эсебинен 889 миң 900 доллар табылды. Бул туурасында УКМКнын маалымат кызматынан кабарлашты.

Эске салсак, Зилалиевге мыйзамсыз байыганы үчүн кылмыш иши козголгон. 

2011-2016-жылдардагы расмий декларациясы туурасында маалымат бергенде, өзүнүн тапкан акчасы 2 миллион 541 миң 527 сомду, ал эми жубайыныкы 408 миң сомду түзгөндүгүн белгилеген.

Анткен менен тиешелүү органдар текшере келгенде Зилалиевдин кайдан тапканы белгисиз, ири суммадагы акчалай активдери, мүлкү чыккан. Алардын баасы расмий кирешеден алда канча ашып кеткен.

"Зилалиев мамлекеттик кызматта турганда декларацияда көрсөтүлбөгөн, бирок топтолгон акчасы 889 миң 900 болуп чыккан. Аны 2018-жылдын сентябрь айына чейин коммерциялык банктардын биринин филиалындагы ячейкада сактаган. Мындан сырткары, декларациясында көрсөтүлбөгөн, туугандарына жана башка тараптарга катталган кыймылсыз мүлкү (батир, үй жана жер тилкелери) чыккан", — деп айтылат маалыматта.

УКМК, мындан сырткары, Бишкекте анын туугандарына 2017-жылдын 17-апрелинде катталган эки кеңсе тууралуу билдирди. Алардын баасы 34 миллион жана 19 миллион сом экендиги айтылды.

"Зилалиев Геология жана минералдык ресурстар боюнча мамлекеттик агенттикти жетектеп турганда өзүнүн ишсиз тууганына алтын, акиташ жана башка кендердин лицензиясын каттатып койгону аныкталды", — деп айтылат маалыматта.

Эскерте кетсек, 2017-жылы 24-ноябрда, президенттин инаугурациясы болгон күнү, күч түзүмдөрүнүн өкүлдөрүнө өкмөттүк трассага коюлган бомба тууралуу маалымат түшкөнү айтылган. Кабарды ИИМ академиясында окуган кыз Зилалиевге таянуу менен билдирген. Бирок ал курсант кыз анын айткандарын туура эмес түшүнүп алышы мүмкүн экенин, же "формаңды оңдоп ал деген сөзгө теригип Зилалиев бомба жарылат деп айтты" деши ыктымал деген пикирин айткан. Бул боюнча Биринчи май райондук соту Зилалиевди үч жылга шарттуу эркинен ажыраткан.