БИШКЕК, 24-ноя. — Sputnik. Президент Алмазбек Атамбаев "КРдин Суу кодексине өзгөртүүлөрдү киргизүү жөнүндө" мыйзамына кол койду. Бул тууралуу өлкө башчысынын сайтында жарыяланды.
Аталган мыйзам Жогорку Кеңеш тарабынан 16-ноябрда кабыл алынып, өкмөттөн дагы колдоо тапкан.
"Мыйзамдын максаты — тоо-кен өнөр жайынын мөңгүлөргө болгон таасирин укуктук жактан жөнгө салуу. Ал стратегиялык маанидеги эң ири объектидеги тынымсыз өндүрүштү камсыздоого багытталган жана өлкөдөгү 6771 мөңгүнүн ичинен 2 мөңгүгө гана ("Давыдов" жана "Лысый") тиешелүү", — деп айтылат маалыматта.
Суу кодексинин 62-67-беренелерине мөңгүлөрдүн абалына таасир тийгизчү тоо-кен өнөр жайынын иш-аракетине тыюу салуудан "Давыдов" жана "Лысый" мөңгүлөрүн алып салууну караган толуктоолор киргизилүүдө.
"Давыдов мөңгүсү акыркы жылдары "Кумтөр" кенинин Борбордук карьерине карата кыймылда болуп, ишкана жумушчуларынын коопсуздугуна олуттуу коркунуч жаратууда. Мөңгүнүн мындан кийинки көзөмөлсүз кыймылы Борбордук карьердин тосмолорунун урашын жана суу менен мөңгү сыныктарына толушуна алып келип, алтындын болгон запастарын ачык да, жер алдындагы да ыкмалар менен казып алууга мүмкүндүк бербей жатат", — деп жазылган маалыматта.
Мыйзам расмий жарыяланган күндөн тартып он күндөн кийин күчүнө кирет.
