Белгилүү режиссёр Болот Шамшиев, актриса Айтурган Темирова жана кичинекей Нургазы Сыдыгалиевдин сүрөтү 1974-жылы Фрунзе (азыркы Бишкек) шаарындагы "Кыргызфильм" киностудиясында тартылган.
Ал жылы Шамшиев залкар жазуучу Чыңгыз Айтматовдун чыгармасынын негизинде "Ак кеме" тасмасын тарта баштап, ага кыргыз элинин бир топ чыгармачыл инсандары катышкан.
Ошол учурду Нургазы Сыдыгалиев мындайча эскерет:
"Кичине кезимде абдан тентек, шок бала элем. Бий ийримине катышып жүргөндө мугалимим мени режиссёр Болот Шамшиевге сунуштаптыр. Анан ал ата-энемди издеп келип мени сураган экен. Мен анда кичинекей болчумун да, ошондон улам көп нерсе эсимде жок. Бирок ал кездеги окуялардын баарын кийин мага тасмага катышкандар айтып беришкен. Бир жерге турбай баарын бүлүндүрүп жүрсөм комиссиядагылар "бул бала жарабайт, азыр эле ушинтип жатса, тасма тартуу учурунда таппай калабыз" дептир. Шамшиев мага "ролду батыраак ойносоң ата-энеңе алып барам" деп алдап образга киргизчү. Мен анда деле образ дегенди билбейм да, өзүмдү эле ойногом. Чыгармада мага ат коёлу десе болбой коюптурмун, ошол бойдон Нургазы болуп аткарып калыптырмын. Тасма эки жыл бою жайында тартылып, "Ак кеменин" айынан мен 1-класска кечигип, 8 жашымда баргам. Бир жолу дөбөдө токтоп турган автобуска кызыгып барып отуруп рулду ары-бери бургулап, тормозунан чыгарып жибериптирмин. Баягы автобус дөңдөн ылдый кетип, эки жолу аласалып, ичиндеги эки адам жаракат алыптыр", — деди Сыдыгалиев.
"Ак кемеде" баланын ролун Нургазы Сыдыгалиев, Момунду Асанкул Куттубаев ойногон. Зөөкүр Орозкулдун образын Орозбек Кутманалиев жаратса, Карыз таенени Сабира Күмүшалиева, Гүлжамал сулууну Айтурган Темирова, шаман кемпирди Даркүл Күйүкова ойногон.
Аталган тасма 1976-жылы Фрунзе шаарында өткөн IX Бүткүл союздук кинофестивалда баш байгени алган. Тасманын оператору Манас Мусаев болгон. Фильмдин үч негиздөөчүсүнө 1977-жылы СССРдин мамлекеттик сыйлыгы ыйгарылган.
