Белгилүү актриса Асел Эшимбекованын күң кыздын ролун аткарган учуру 1986-жылы тартылган.
Ал жылы атактуу кинорежиссёр Төлөмүш Океев коңшу "Тажикфильм" жана Сириянын Ganem-film студиялары биргелешип "Сүйүү закымдары" көркөм тасмасын тарткан.
Анда Таттыбүбү Турсунбаеванын кызы Асел Эшимбекова башкы ролду аткарган.
Ошол учурду аталган тасмага катышкан актёр Эдилбек Чокубаев мындайча эскерет:
"Ал кезде саналуу гана тасмалар чет элдиктер менен чогуу тартылчу. Режиссёр Төлөмүш Океев аны Сирия, Египет, Өзбекстанга чейин барып тартып калды. Кыргыздын бир топ каскадёр жигиттери да катышкан. Сүрөттөгү Асел Эшимбекова башкы ролду аткарган. Өтө жылдыздуу, келишимдүү, кинонун адамы болчу. Тасманы тартуу маалында башка актрисалардан айырмаланып турчу. Менимче, "Сүйүү закымдары" анын образ жараткан алгачкы тасмаларынын бири. Кийин Дооронбек Садырбаевдин "Махабат дастаны" тасмасында да иштешип калдык. Турмуш кургандан кийин чыгармачылыктан алыстап кетти. Абдан жөнөкөй, шайыр кыз болчу", — деп эскерет Чокубаев.
Асел Эшимбекова турмушка чыгып кино тармагынан алыстаган. Ал ишкер жолдошу Урмат Барыктабасов экөө уул-кыздарын тарбиялап келет.
