БИШКЕК, 4-дек. — Sputnik. "Кыргызстан — кыска метраждуу тасмалардын өлкөсү" эл аралык кинофестивалына калыстык кыла турчулар аныкталды. Бул тууралуу уюштуруучулар билдирди.
Калыстардын төрагасы болуп россиялык кинотаануучу жана тарыхчы Сергей Землянухин дайындалды. Аны менен чогуу кароого келген тасмаларды Эрнест Абдыжапаров (Кыргызстан), кинопродюсер Анар Кашаганова (Казакстан), кинорежиссер жана сценарист Нана Жанелидзе (Грузия), кинооператор Арто Хачатурян (Армения) сындан өткөрөт.
Эл аралык кинофестиваль 12-15-декабрда Бишкектеги "Манас" кинотеатрында болот. Калыстар эл аралык жана улуттук тасмаларды "Мыкты тасма", "Мыкты режиссура", "Калыстардын атайын белеги" жана "Көрөрмандардын купулуна толгон тасма" номинациялары боюнча бааламакчы.
Бул маданий иш-чара КМШга мүчө өлкөлөрдүн мамлекеттер аралык гуманитардык кызматташуу фондусунун колдоосу, КРдин Маданит, маалымат жана туризм министрлиги, "Айтыш" коомдук фондусу жана Кыргызстандын Кинематографтар биримдигинин көмөгү менен өтүүдө.
