БИШКЕК, 7-авг. — Sputnik. АКШ президенти Дональд Трамп "кийинки аптада" РФ лидери Владимир Путин менен жолугууга ниеттенип турганын The New York Times Ак үйдөгү маселеден кабары бар кишилерге таянып билдирди.
Басылма Трамп Россия президенти менен боло турган жолугушуудан кийин үч тараптуу, тагыраагы, Путин жана Владимир Зеленский болуп сүйлөшүүлөрдү өткөрүүнү пландап жатканын жазган.
"Сүйлөшүүгө үчөө гана катышат. Ал жерде европалык өлкөлөр болбойт", — деп айтылат материалда.
Анда Трамптын ЕБ мамлекеттеринин башчылары менен телефондон сүйлөшкөндө алар менен да жолугууну көздөп турганы айтылган.
Маалымат булактар буга чейин согушту жөнгө салууга аракет кылып келген Европа өлкөлөрүнүн лидерлери АКШ президентинин билдирүүсүнө "кыязы, моюн сунганын" кошумчалады.
Трамп Германиянын канцлери Фридрих Мерцке телефондон өзүнүн чабарманы Стивен Уиткоффтун Путин менен жолугушуусу "күтүлгөндөн да жемиштүү" болгонун айткан. Мындай маалыматты Bild басылмасы өзүнүн бул маселеден кабары бар кишилерине таянып таратты.
Ак үйдүн маалымат катчысы Каролин Левитт болушу мүмкүн делген жогорку деңгээлдеги жолугушууну өткөрүү планына комментарий берип жатып, Россия тарап Трамп менен кездешүүгө ынтызар экендигин айткан. АКШ лидери мындай кадамга ачыктыгын билдирген.
Кечээ Россия лидери Кремлде АКШ призентинин атайын өкүлү Уиткофф менен жолугуп, сүйлөшүү үч саатка чукул созулган. Бул — Трамптын өкүлүнүн Россияга болгон бешинчи сапары.
РФ лидеринин жардамчысы Юрий Ушаков тараптардын баарлашуусу пайдалуу жана конструктивдүү болгонун билдирди. Анда украин кризиси каралып, андан кийин АКШ менен Россиянын ортосундагы стратегиялык кызматташтыктын келечеги талкууланган.
Ал эми Трамп жолугушууда прогресс жогору болгонун белгилеген. Бул сапардагы сүйлөшүү өтө майнаптуу болду деп баа берген. Америка лидери жакынкы күндөр менен жумаларда согушту аягына чыгаруу боюнча иштөөгө ниет кылып жатканын айткан.