БИШКЕК, 26-июл. — Sputnik. Келе жаткан 2023-жылы эң төмөнкү пенсия 7 200 сомго жеткирилет. Бул туурасында Социалдык фондунун төрагасы Бактияр Алиев маалымат жыйында билдирди.
Анын айтымында, учурда орточо пенсия 6 100 сомду түзөт.
"Бүгүнкү күндө пенсионерлердин жашоо минимуму 7 200 сом болуп жатат. Буюрса, ошого жеткиргенге аракет кылабыз. 2023-жылдын январына чейин пенсионерлердин 50 пайызынын эң төмөнкү пенсиясын жашоо минимумдун суммасына теңейбиз. Жыл соңуна чейин 100 пайызга чейин жеткиргенге аракет кылабыз", — деди Алиев.
Андан соң Sputnik Кыргызстандын кабарчысы "2023-жылдын 1-январына чейин эң төмөнкү пенсия жашоо минимумга барабар болушу керек деген конституциялык норма аткарылбай калабы?" деп сурады.
"Бюджетке карайбыз да, каражат болсо жеткиребиз. Бүгүнкү күндө акча кичине тартыш болуп жатат. Эки жума күтүп турсаңыз, бул боюнча маалыматты толугу менен беребиз", — деди Алиев.
Белгилей кетсек, Конституциянын 44-беренесинин 2-бөлүмүндө "Пенсиялар, социалдык жөлөк пул жана башка социалдык жардам мыйзамда белгиленген жашоо минимумдан кем эмес жашоо деңгээлин камсыз кылууга тийиш" деп жазылган. Бул мыйзам 2023-жылдын 1-январынан тартып күчүнө кирери белгиленген.
Улуттук статистика комитетинин маалыматы боюнча, учурда жашоо минимуму — 7 318 сом.