Бегалиев: атактуу спортчулар жаштар менен тажрыйбасын бөлүшсө спорт өнүгөт
Кыргыз спортунда атагы алыска тараган Каныбек Осмоналиев, Орзубек Назаров, Алмаз Раимкулов, Руслан Түмөнбаев, Данияр Көбөнөв, Талант Дүйшебаев өңдүү чемпиондор бар. Алар бүгүнкү күндө чоң спорттон четтеп, ардактуу эс алууда. Бирок бул спортчулардын эл аралык аренада тажрыйбасы мол. Менимче алар ошол көп жылдардан бери топтогон билимин жаштарга өткөрүп бериши керек. Мындай пикирин Канат Бегалиев Sputnik Кыргызстан радиосуна маек куруп жатып билдирди.
Анын айтымында, бул демилгени ал көптөн бери сунуштап келет. Бирок спорт жаатын тейлеген аткаминерлер ага кайдыгер мамиле жасашууда.
"Атамекендик спортту кантип өнүктүрсө болот?" деген суроону байма-бай угуп келем. Туура, мындай маселе бар жана бул багытта тийиштүү чаралар көрүлүп жатат. Бирок спортту бир эле каражаттын көлөмүн көбөйтүү менен өнүктүрүүгө мүмкүн эмес. Жогорку деңгээлге чыгуу үчүн ошол даражадагы адистер да керек. Тилекке каршы, андай кесипкөй кадрлар бизде аз. Бирок атамекендик спорт жаатында аты чыккан, тажрыйбалуу спортчуларыбыз бар. Алар эл аралык жана дүйнөлүк аренада өз чеберчилигин татыктуу түрдө көрсөтүп келишкен. Мына ошолорду үлгү катары жаш спортчуларды даярдоодо машыгуу процесстерине тартуу керек. Жаштардын жанында дүйнө чемпиондору жүрсө, алар үчүн стимул да болот. Бир кезде өлкөнү дүйнөгө тааныткан спорт жылдыздарынан уучубуз куру эмес. Алар бүгүн кайда? Эмне менен алек болуп жатышат? Аларды улуттук курама командалардын катарына кошуп, кеминде бирден-экиден жаш спортчуну шакирт кылып кошуп беришибиз керек. Аны менен бирге эгер чемпионду даярдасаң, мисалы, батир ыйгарабыз деп да шык берүү зарыл. Менин оюмча, ушундай ыкма аркылуу спортчуларды даярдасак олимпиада оюндарынан бир эмес, бир нече алтынды багындырууга болот", — деди Бегалиев.
Спортчу ушу тапта КР Күрөш федерациясынын биринчи вице-президенти..
