БИШКЕК, 21-июн. — Sputnik. Жогорку Кеӊештин депутаттары бүгүн "Мамлекеттик жөлөк пулдар жөнүндө" мыйзам долбоору үчүнчү окууда жактырганын парламенттин маалымат кызматы кабарлады.
Жактырылган мыйзамга ылайык, ар бир жаңы төрөлгөн балага бир жолку сүйүнчү пул берилет. Эмгек жана социалдык өнүктүрүү министринин орун басары Лунара Мамытованын айтымында, сүйүнчү пулдун көлөмү 2700 сомдун тегерегинде болот.
Мындан сырткары наристеге үч жашка чейин жөлөк пул төлөнүп, көп балалуу үй-бүлөнүн биринчи, экинчи балдарынан башка балдарына жөлөк пул төлөө шарттары да каралган. Ошондой эле бийик тоолуу райондордо жашагандардын балдарына берилүүчү каражат көбөйтүлүп берилет.
Ал эми жогоруда белгиленген жөлөк пулдар үчүн мамлекеттик казынадан 1,8 миллиард сом бөлүнүшү шарт.
Аталган демилге эл өкүлдөрү Карамат Орозова менен Аида Касымалиевага таандык.
