Бишкектеги мамлекеттик имараттар жери менен инвесторлордун ээлигине өтүшү мүмкүн
13:15 16.06.2026 (Жаңыртылды: 13:16 16.06.2026)
© Sputnik / Эмиль Садыров
Жазылуу
БИШКЕК, 16-июн. — Sputnik. Бишкектин борбордук бөлүгүндөгү мамлекеттик органдардын жана ооруканалардын имараттары, ошондой эле алар жайгашкан жер тилкелери инвесторлорго өткөрүп берилиши мүмкүн. Бул тууралуу жарлыкка президент Садыр Жапаров кол койду.
Маалыматка караганда, мындай чечим Бишкек шаарында заманбап административдик комплекстерди жана жаңы медициналык шаарчаны куруу долбоорлорун тездетүү максатын көздөйт.
Документтин урунттуу учурлары:
мурдагы жарлыктарда инвесторлорго негизинен "имараттар жана курулмалар берилет" деп көрсөтүлсө, жаңы өзгөртүүлөргө ылайык, имараттар менен бирге аларга бекитилип берилген жер тилкеси да инвесторлордун ээлигине өтөрү көрсөтүлгөн;
тарыхый-маданий эстелик катары эсептелген административдик имараттар дагы жеке инвесторлорго өткөрүп берилет. Алар менен өкмөт тендер же аукцион өткөрбөстөн, түз сүйлөшүүлөр аркылуу келишим түзүшү мүмкүн. Мында да объектилер менен кошо жер тилкелери инвесторго өтөт. Эгерде түз келишим түзө турган инвестор чет элдик компания же жаран болсо, анда Кыргызстандын Жер мыйзамдарындагы чектөөлөр сакталары (мыйзам боюнча, чет элдиктер жерди менчикке ала албайт, аларга узак мөөнөттүү ижарага берилет) белгиленген;
министрлер кабинети мамлекеттик мүлктөрдү, анын ичинде жер тилкелерин инвесторлорго түз сүйлөшүүлөр аркылуу өткөрүп берүүнү жөнгө салган атайын мыйзамдардын топтомун даярдап, Жогорку Кеңештин кароосуна киргизиши керек;
инвесторлорго өткөрүп бериле турган административдик имараттардын, курулмалардын жана аларга таандык жер тилкелеринин бүгүнкү күндөгү реалдуу баасын (рыноктук баасын) аныктоо үчүн көз карандысыз адистер тартылат;
медициналык мекемелер жаңы шаарчадагы объектилер пайдаланууга берилген сайын этап-этабы менен көчүрүлөт;
медициналык мекемелердин мүлкүн жана жерлерин инвесторлорго өткөрүүдөн түшкөн каражаттарды эсепке алуу үчүн өзүнчө атайын эсеп ачылат.
