Мамытов: Кыргызстан ЕАЭБде болгону үчүн күйүүчү майды арзан алып келет
© Sputnik / Асылбек Бактыбеков
Жазылуу
Мамлекеттик башкаруу академиясынын жаңы экономика боюнча илим-изилдөө кафедрасынын жетекчиси, экономист Улукман Мамытов мунай продукцияларынын дүйнөлүк экономикадагы ордуна токтолду.
Мунай затты өндүрүү боюнча сөз болгондо дүйнөдө мамлекеттер экиге бөлүнөт. Биринчиси — өндүргөндөр, экинчиси — керектөөчү өлкөлөр. Экөөнүн кызыкчылыгы эки башка. Мындай пикирин Улукман Мамытов Sputnik Кыргызстан радиосуна маек куруп жатып билдирди.
Анын айтымында, Кыргызстан мунайды керектөөчүлөрдүн катарында болгонуна карабай арзан баада сатып алып келет. Буга ЕАЭБге мүчө болуусу себеп.
"Дүйнөлүк экономикада мунайдын орду чоң, негизги орунду ээлейт десек да болот. Андан бир гана күйүүчү май эмес, башка да көптөгөн продукциялар өндүрүлгөндүктөн бүгүнкү күнгө чейин таасирин жоготпой келет. Мунай тууралуу сөз болгондо керектөөчүлөр жана экспорттоочулар болуп мамлекеттер экиге бөлүнүп калат. Экөөнүн кызыкчылыгы бири-бирине карама-каршы келет. Бири арзан алгысы келсе, экинчиси кымбат саткысы келет. Мунун айланасында дайыма кызыкчылыктар кагылышат. Экологиялык маселелер, коомдогу көз караштардын өзгөрүшү менен мунай продукцияларын башка булактардан өндүрүү маселелери көп айтыла баштады. Муну менен катар эле дүйнөдөгү геосаясий абалдан улам мунай продуктуларын экспорттоо бир гана доллар менен эмес, башка валюталарда жүрсө доллардын кунунун түшүшүнө жана жалпысынан эле дүйнөлүк экономикага чоң таасирин тийгизет. Мунай продукциялары, ошол эле күйүүчү майды сатып алууда Кыргызстан үчүн жакшы бир мүмкүнчүлүк бар. Ал — биздин ЕАЭБге мүчө болгондугубуз. Болбосо азыркыдан баа бир топ жогору болмок", — деди Мамытов.
Ал Кыргызстанда да мунайды казып алууда алгылыктуу кадамдар башталганын жана кайра иштетүүгө да олуттуу көңүл буруу зарылдыгын кошумчалады.
