Ипотека эле эмес. Пенсиянын топтомо бөлүгүн дагы эмне максатта алса болот?
© Sputnik / Жоомарт Ураимов
Жазылуу
Акчаны алууга мүмкүнчүлүктөрдүн тизмеси мурдагыдан кеңейтилгени белгиленди.
БИШКЕК, 16-июл. — Sputnik. Пенсиянын топтомо бөлүгүн төлөө механизмдерине министрлер кабинетинин № 329 токтому менен өзгөртүүлөр киргизилди. Бул тууралуу Социалдык фонддон билдиришти.
Маалыматка ылайык, анын максаты — пенсиянын топтомо бөлүгүн колдонуу варианттарын кеңейтүү.
Эми пенсиянын топтомо бөлүгүн төмөнкү максаттарга алса болот:
ипотекалык кредиттер — Улуттук банктын лицензиясы бар финансы-кредиттик уюмдар, Бишкек жана Ош шаарынын мэриялары аркылуу баштапкы төлөмдү каржылоого же ипотеканы жабууга;
үлүштүк курулуш — Бишкек жана Ош шаарларынын мэриялары тарабынан "МИК" ААК аркылуу берилген үлүштүк курулушка катышуу үчүн колдонсо болот;
оор ооруларды дарылоо — пенсиянын топтомо бөлүгүн колдонууга мүмкүн болгон оорулардын тизмеси кеңейтилди. Мисалы, боордун өнөкөт жетишсиздиги, цирроз (гепатит В жана С – 4-5 стадиялар, органдарды трансплантациялоону талап кылган жана органдарды трансплантациялоо) жана бешинчи стадиядагы өнөкөт бөйрөк жетишсиздиги менен ооругандар үчүн гемодиализ кызматтарын алуу;
Соцфонддон буга чейин аталган акчаны төмөнкү тизмедегилерлин алуусу мүмкүн болуп келгенин эске салды:
пенсия курагына жеткен жарандарга төлөп берүү — пенсия курагына жеткендер топтолгон каражатты ала алышат;
чет өлкөгө кеткендер — Кыргызстандан тышкары туруктуу жашоого кеткен жарандар пенсиялык топтомолорун ала алышат;
мураскорлор — каза болгон жаран тирүүсүндө камсыздандырылса жеке камсыздандыруу эсебиндеги топтолгон каражатты маркумдун мураскорлору алууга укуктуу;
аскер кызматкерлерине төлөө — жашы 63 жашка жетип, эсебинде каражаты болгон учурда топтомо пенсиялык фонддон каражатты алуу мүмкүнчүлүгүнө ээ болушат. Аскер кызматчылары Соцфондго камсыздандыруу төгүмдөрүн аскердик кызмат өтөө мезгилинде чегербей тургандыгын белгилей кетүү маанилүү. Бул мүмкүнчүлүк аскердик кызматка чейин же андан кийин жарандык чөйрөдө иштеген жана Соцфондго тиешелүү төгүмдөрдү төлөгөн жарандарга карата колдонулат;
ипотекалык насыялоо — ипотекалык насыя алган же алып жаткан жана МИК тарабынан каржыланган мамлекеттик турак жай программасынын алкагында кийин сатып алуу менен турак жайды ижаралоо келишими боюнча каражаттарды төлөгөн жарандар, ошондой эле алардын жубайлары, өз үйү бар болсо дагы пенсиялык топтоо каражаттарын баштапкы төгүмдү каржылоо жана ипотекалык насыясын төлөө үчүн колдоно алышат;
жумушсуздук — расмий түрдө жумушсуз деп таанылган адамдар эмгекке жарамдуу курактагы калктын жашоо минимумунун өлчөмүн эске алып пенсиялык топтоо каражатын алууга укуктуу;
оор ооруларды дарылоо — каражатты оор илдети бар бейтаптарды дарылоого жумшай алатса болот.
