Министрлик жаратылышта эс алуудагы коопсуздук чараларын эскертти
© Sputnik / Кирилл Зыков
/ Жазылуу
Жаратылыш койнуна ачык кийимдерди кийип баруудан алыс болуңуз. Буту-колду толук жапкан спорттук кийимдер ыңгайлуу келип, кенеден да сактайт.
БИШКЕК, 11-май. — Sputnik. Саламаттык сактоо министрлигинин алдындагы Ден соолукту чыңдоо борбору жаратылышка чыгуу жан дүйнөнү да, дене бойду да эс алдыруунун мыкты түрү экенин белгилеп, бирок мындайда коопсуздукту эске алуу зарылдыгын эскертти.
Борбор эс алуучуларды төмөнкү эрежелерди сактоого чакырган:
жаратылыш койнуна ачык кийимдерди кийип баруудан алыс болуңуз. Бутту, колду толук жапкан спорттук кийимдер ыңгайлуу келип, кенеден да сактайт;
кумурсканын уюгу, аарынын уясы сыяктуу жайларды кылдат карап, алардан алыс болуу керек;
эс алууга балдар менен барганда аларды кароосуз калтырбагыла. Өзгөчө суу жээгине барганда коопсуздукту катуу сактоо эскертилет;
токойдогу түрдүү мөмө-чөмө, козу карындарды үзүп, терип жебегиле. Алар уулуу болуп калышы мүмкүн.
көлмөдөгү сууну ичпегиле;
уруксат берилбеген, сизге тааныш эмес болгон көлмөлөргө түшпөгүлө;
алкоголду ашыкча ичпегиле.
"Тоо, талаага барып эс алууда кокустан жаракат алып, күн өтүп же ууланып калгандар болушу мүмкүн. Андыктан алыска аттанар алдында жаныңарда бинт, спирттелген салфетка, суутек перекиси, йод, пластырь, кебез, күйүккө, ич өткөккө зарыл дары каражаттары, чиркей, кене менен күрөшүүчү каражаттар, аллергияны кетирчү дары-дармек, күндөн коргоочу крем сала жүрүш керек", — деп айтылат министрликтин эскертүүсүндө.
Ошондой эле дарыгерлер жетишерлик көлөмдө ичүүчү таза суу алып алуу керектигин билдирген. Суу адам чаңкап, организмдин кургап кетүүсүнөн коргоого, капыстан жаракат алган жерди жууганга керек болорун кошумчалашты.
