Шарапов: 2023-жылы өлкөдө кутурманын 36 учуру катталды
© Sputnik / Шабдан Абылгазы уулу
Жазылуу
Айыл чарба министрлигине караштуу ветеринардык кызматтын директорунун орун басары Бакыт Шарапов учурда эпизоотиялык абал туруктуу экенин айтты.
Мал-жандыктардан жугуучу кутурма, шарп, күйдүргү, бруцеллез, эхинококкоз, кой-эчкилердин күл, кыргын ылаңдарына каршы күрөшүүгө мамлекет тарабынан каржы бөлүнүп, алдын алуу иштери жүрүүдө. Бул тууралуу Бакыт Шарапов маек куруп жатып билдирди.
Шарапов: 2023-жылы өлкөдө кутурманын 36 учуру катталды
Анын айтымында, быйыл 102 миллион сомдун тегерегиндеги каражатка дары-дармек алуу пландаштырылган.
"Кыргызстанда азыр эпизоотиялык абал туруктуу. 2023-жылы 24 миллион баш малга ветеринардык иш-чаралар жүргүзүлүп, анын ичинен эмдөө 22,9 миллион, диагностикалык изилдөөлөр 1,2 миллион баш малга жасалган. Негизи мамлекет тарабынан өтө коркунучтуу тогуз ылаңга каршы дары-дармек сатып алынат. Бул өткөн жылы 86,9 миллион сомду түзгөн. Шарп ылаңы, күйдүргү, кутурма, бруцеллёз, койлордун күл жана кыргын ылаңына вакцина алынды. Ал эми туберкулез, жылкынын маңкасына (сап) дары жана иттердин эхинококкоз оорусуна каршы таблеткалар алынган. Быйыл да 102 миллион сомдун тегерегиндеги каражатка препараттарды алуу пландаштырылды. Түштүк аймакта кутурманын 36 учуру катталып, 228 миң 100 баш итке эмдөө жасалган. Ал эми бодо малда бруцеллез кездешкени менен өтө коркунучтуу ооруларга кирген шарп ылаңы, кой-эчкилердин күл, кыргын оорусу катталган жок. Республика боюнча ветеринардык дары-дармек ташып келген 246 ишкердик субъект бар", — деди Шарапов.
Ал учурда Ветеринардык кызмат антибиотиктерди жана гельменттерге каршы препараттарды алып келүү жана сатуу боюнча иш жүргүзүп жатканын кошумчалады.
