УКМК Турсунтай Салимовдун уулуна издөө жарыялады. Байлыгынын тизмеси
18:29 20.11.2023 (Жаңыртылды: 18:34 20.11.2023)
© Sputnik / Аида Джумашова
Жазылуу
Атайын кызмат Илшат Салимовдун мыйзамсыз байыганын айтып, ал ээлик кылган мүлктү тизмектеген.
БИШКЕК, 20-ноя. — Sputnik. "Мадина" базарынын негиздөөчүсү Турсунтай Салимовдун уулу Илшат Салимовго сыртынан айып тагылып, издөө жарыяланды. Бул тууралуу УКМКнын маалымат кызматы кабарлады.
Билдирмеге караганда, ал атасы сыяктуу Камчы Көлбаевдин уюшкан кылмыштуу тобун каржылаган деп, кылмыштуу кирешелерди легалдаштырууга шектелүүдө.
"Иликтөө иштеринин жүрүшүндө Илшат Салимов криминалдык авторитет Көлбаевдин таасиринен пайдаланып, коркутуу жолу менен өнөктөштөрүн ар кандай бизнес-долбоорлордогу үлүшүнөн мыйзамсыз ажыратып, ал кирешеден жер тилкелерин сатып алып, Көлбаевдин уюшкан кылмыштуу тобуна демөөрчүлүк кылган", — деп жазылат маалыматта.
УКМК базар ээсинин уулунун курулуш компанияларында да үлүшү болгонун айтып, аларды тизмектеди.
"Мадина" базарынын негиздөөчүсү Турсунтай Салимовдун уулу Илшат Салимов
© Фото / пресс-служба ГКНБ КР
"Бишкекте жалпы аянты 3 гектардан ашык кымбат баалуу жер тилкелери бар, ал жерде курулуш компаниялары премиум-класстагы көп кабаттуу үйлөрдү куруп жатышат. Ошондой эле салынып жаткан үйлөрдө жалпы баасы болжол менен 12 миллион доллар болгон 110дон ашык батир бар", — деп жазылат кабарда.
1995-жылы "Мадина" ЖЧКсы (ээси Турсунтай Салимов) мурдагы № 155 бала бакчанын (Чыгыш-5 кичирайону, азыркы "Прадо" эс алуу жайы, болжолдуу баасы 5 миллион долларды түзөт) имаратын "Кыргыз камволдук-нооту комбинаты" ААКсынан мектепке чейинки билим берүү мекемелерин менчиктештирүү боюнча мыйзамдарды бузуу менен менчикке алганы айтылды. Андан соң Турсунтай Салимов менен уулу курулуш компаниялардын бири менен премиум-класстагы көп кабаттуу турак жайды куруу боюнча келишим түзүшкөнү аныкталды.
"Көп кабаттуу үйдү салып баштоо үчүн курулуш компаниясы Салимовдорго кепилдик үчүн баасы 500 миң доллар турган батир берүүнү убадалаган. Бирок ал курулушка уруксат берилбей, келишим бузулган. Анткен менен Илшат Салимов ал батирди кайтарып берүүдөн баш тарткан. Кийинчерээк бул батирди Көлбаев Чолпон-Ата шаарында "Зодиак" казиносунун ордуна соода борборун куруу үчүн жер тилкеге алмаштырып алган", — деп жазылат УКМКнын билдирүүсүндө.
Мындан тышкары, Салимов башында турган Т.S. Group ЖЧКсы "Кыргыз камволдук-нооту комбинаты" ААКсынан 11,5 миллион долларга жакын, жалпы аянты 4,5 гектар кампа жайларын мыйзамсыз чыгарып алганы айтылды.
"Илшат Салимовдун Чолпон-Ата шаарындагы "Каганат" эс алуу борборунда, Көлбаевдин коттеджинин жанында жайгашкан 600 миң долларлык коттеджи бар, ошондой эле курулуп жаткан "Каганат Резорт" эс алуу борборунда 700 миң долларлык дагы бир коттеджге ээлик кылат.
Ошондой эле анын шаардын борборунда баасы 700 миң долларлык бир нече батири болгон", — деп айтылат маалыматта.
Мындан сырткары, ал жүк ташуу, коомдук тамактануу, курулуш жаатында да көптөгөн компаниялардын ээси экени кошумчаланды.
13 Жетинин айы 2023, 13:44
