Жол кырсыгынан жабыркаган адамга жардам көрсөтүүнүн жол-жобосу видеодо
Жазылуу
Жардам көрсөтүүдөн мурун кырсык болгон жер сизге жана жабырлануучу үчүн коопсуз экендигин текшериңиз.
Кыргызстанда, тилекке каршы, жол кырсыктары көп катталат. Sputnik Кыргызстан мындай кырсыктан жабыркаган адамга алгачкы жардамды туура көрсөтүү жөнүндө билип көрдү.
Жабырлануучуга жардам көрсөтүү боюнча кеңештерди Кызыл Ай коомунун адиси айтып берди. Ал алгачкы жардамды тиешелүү маалыматы барлар көрсөтүшү керек деген пикирде.
Сунуштар:
адегенде жардам көрсөтүү үчүн окуя болгон жердин коопсуздугун текшериңиз. Кырсыкка кабылган унаадан күйүүчү май агып жаткан жокпу? Аны карап чыгып, май акпаса, кыймылдаткычты өчүрүп, авариялык сигналды күйгүзүп коюңуз (эгерде бул мүмкүн болсо);
андан кийин 103 номерин терип, Тез жардам кызматына чалыңыз, муну менен катар Куткаруу кызматына, милицияга кабар бериңиз;
кырсык болгон бөлүктүн айланасына бул тууралуу башкалар биле тургандай кылып белгилерди коюу зарыл; .
мындай кырдаалда сактай турган башкы эреже – жабыркаган адамды ордунан жылдырбаңыз. Аны кыймылдатуу, жылдыруу, дагы башка аракеттер жаракатын оорлотушу мүмкүн;
дем алып жатканын текшерүүдө башын өзүңүзгө каратуу, кыймылдатуу да туура эмес. Ал кандай абалда жатса ошол бойдон текшериңиз;
бир эле учурда, эгер жабырлануучу кооптуу жерде жатып калса гана жылдырууга туура келет. Башка учурда тез жардамды күтүү сунушталат.
Эскертүү: жогорудагы кеңештердин кайсы бири туура эмес аткарылып же жардамы тийбей калган учурга Кызыл Ай коомунун адистери менен Sputnik Кыргызстан маалымат агенттиги жоопкер эмес.
Тема боюнча:
