Камчыбеков: айрым кендер Ысык-Көл биосфералык аймагына кирип калган
12:17 27.04.2023 (Жаңыртылды: 13:05 27.04.2023)
© Sputnik / Асель Сыдыкова
Жазылуу
Тоо-кен өндүрүүчүлөр жана геологдор ассоциациясынын төрагасы, техникалык илимдердин доктору, академик Дүйшөнбек Камчыбеков 10 жылдан кийин өлкөнүн минералдык-сырьелук базасы түгөнүшү ыктымал экенин белгиледи.
Айрым кендер Ысык-Көл биосфералык аймагына кирип калган. Аларды иштетүүгө мүмкүндүк түзүү зарыл. Бул тууралуу Дүйшөнбек Камчыбеков Sputnik Кыргызстан радиосуна маек куруп жатып билдирди.
Камчыбеков: айрым кендер Ысык-Көл биосфералык аймагына кирип калган
Анын айтымында, Кызыл-Омпол аймагында уранды иштетүү аракети көрүлгөндө геологдор биосфералык аймакта жайгашкан кендер боюнча изилдеген.
"Тоо-кен тармагы союз учурунда изилденген кендердин базасында иш алып барууда. Ошондуктан келечек үчүн чалгындоо иштерин жүргүзүп баштоо зарыл. Мындан тышкары, чалгынданып, изилденип баланска коюлган кендер бар, бирок алардын айрымдары биосфералык аймакта жайгашкан. Ошолорду иштетүүгө уруксат алуу керек. Маселен, Ысык-Көл биосфералык аймагы 4,3 миллион гектар, эбегейсиз чоң жер. Алгач биосфералык аймактын буфердик зонасы деген көл жана анын жээги эмес экенин түшүндүрүү зарыл. Ал жердеги кендерди иштеткенде дагы калдыктар көлгө зыянын тийгизбейт. Ошол эле Жетим-Тоонун Күрмөнтү участогу Тоң районуна тиешелүү болуп, биосфералык аймакка кирет. Аталган кендин болжолдуу кору үч миллиард тоннадай болуп, экономикага салым кошорун белгилеп келебиз. Мындан тышкары, Сары-Жазда Тоголок деген алтын кендин кору 20 тоннадан кем эмес. Ошол эле Тоңдо электромобилдерге колдонула турган литий, Кызыл-Омполдо урандан башка торий жана башка сейрек кездешүүчү металлдар бар. Мунун баары биосфералык аймакта болгондуктан учурда иштетүүгө мүмкүндүк жок", — деди Камчыбеков.
Ошондой эле ал тоо-кен тармагы 2022-жылы 48 миллиард сом пайда келтиргенин кошумчалады.
Эске сала кетсек, министрлер кабинетинин Ысык-Көлдүн биосфералык аймагынын буфердик зонасында кендерди чалгындоого жана иштетүүгө уруксат берүүнү пландаган токтом долбоору коомдук талкууга коюлду.
