Юрист ишкердик үчүн имаратты ижарага алуунун шарттарын айтып берди
13:45 03.01.2023 (Жаңыртылды: 15:46 06.01.2023)
© Sputnik / Асель Сыдыкова
Жазылуу
Юридикалык клиникалар ассоциациясынын жетекчиси Артур Бакиров ишкердик үчүн имаратты ижарага алууда келишим түзүүнүн шарттары тууралуу айтып берди.
Ишкерлик үчүн имарат, бөлмө же кеңсе ижара алууда сөзсүз келишим түзүлүшү керек. Бул тууралуу Артур Бакиров Sputnik Кыргызстан радиосуна маек куруп жатып билдирди.
Юрист ишкердик үчүн имаратты ижарага алуунун шарттарын айтып берди
Анын айтымында, келишим жазуу түрүндө болуп, нотариалдык күбөлөнүшү зарыл.
"Дарыкана, дүкөн, чач-тарач ж.б.у.с. имаратты ижарага алууда сөзсүз келишим түзүү зарыл. "Жарандык кодекске" ылайык, келишим жазуу түрүндө болушу абзел. Документ бардык олуттуу шарттары боюнча макулдашууга жетилгенде түзүлөт. Мүлктүк, мындайча айтканда, ижараны жалдоо келишим аныкталган мөөнөткө түзүлөт. Имаратты, кеңсени, кампаны ижарага алууда тиешелүү келишимдин формаларын сактоо керек. Бул норма "Жарандык кодекстин" 590-беренесинде көрсөтүлгөн. Ал кагаз, жазуу жүзүндө болуп, нотариалдык жактан күбөлөнүп, мамлекеттик каттоодон өтүүгө тийиш. Анткени ижарачы имаратка кошумча оңдоп-түзөө иштерин жүргүзүшү ыктымал. Ал эми жогоруда айтылгандай форма сакталбаса имараттын кожоюну келишимден баш тартышы мүмкүн. Бул учурда ижарачынын укуктары бир тараптуу бузулган болот. Эки тарап макулдашкан документте имараттын аянты, толук дареги, мөөнөтү, шарттары, ижара акысынын баасы жана ага өзгөртүү киргизүү шарттары так жазылышы зарыл", — деди Бакиров.
Юрист келишимде убактысы аныкталбаса ал белгисиз мөөнөткө түзүлгөн деп эсептелерин кошумчалады.
